Nege qazaqtildi kórermen kınony yńǵaıly ýaqytta kóre almaı otyr?

Kórermender "Qara qabylan: Ýakanda jasasyn!" blokbasteri kınoteatrlarda qazaq tilinde yńǵaıly ýaqytqa qoıylmaǵanyn aıtyp shaǵym aıtyp jatyr, dep habarlaıdy Almaty-akshamy.kz Inbusiness.kz-ke silteme jasap.

Esbol Nurahmet esimdi áleýmettik jeli qoldanýshysy kınoteatrlarda kúnine 15-ke jýyq seanstyń tek bireýi ǵana qazaq tilinde kórsetiletinin, onda da qazaqtildi qaýym úshin yńǵaısyz ýaqytqa qoıylǵanyn jetkizdi.

"Ádemilep qazaqshaǵa aýdarǵan. Endi kınoteatrlarda kúni boıy 10-15 seansqa deıin qoıylyp jatyr. Sonyń tek bireýi áreń qazaqsha, onyń ózi ne tańerteń, ne túske qaraı. Bul ne degen ıttik? Jurt jappaı kórip, áleýmettik jelide bólisip jatyr. Biraq oryssha kórip jatyr. Onyń basty sebebi – yńǵaıly ýaqytqa qoımaýynan dep túsinemin. Mınıstrlik qanshama qarjy jumsap, qazaqshaǵa aýdarǵan eken, endi sony yńǵaıly ýaqytqa qoıýǵa nege mán bermeıdi?", – dep jazdy Esbol Nurahmet feısbýk paraqshasyna.

Ózge jeli qoldanýshylary "Reseı Federasıasynyń bir avtonomıasynda ómir súrip jatqan soń, tańqalýdy qoıdyq", dep pikir bildiripti.

Aıta ketelik, "Qara qabylan: Vakanda jasasyn!" blokbasteri kınoteatrlarda qazaq tilinde kórsetiletinin aıtqan mádenıet jáne sport mınıstri Dáýren Abaev "Halyqqa reıtıńi joǵary fılmderdi qazaq tilinde kórsetý – ıdeologıalyq turǵydan da asa mańyzdy", degen bolatyn. Mınıstrlik atalǵan fılmdi 10 qarashadan bastap elimizdiń barlyq kınoteatrlarynda kórsetiletindigin habarlaǵan bolatyn.

Atalǵan fılmniń Astana kınoteatrlaryndaǵy 12 qarasha kúngi 102 kórsetiliminiń 6 seansy ǵana qazaq tilinde.