Almaty qalasy jastar saıasaty basqarmasynyń qoldaýymen «Dúısenbilik sport» jobasy boıynsha «Social project management» ortalyǵy» qoǵamdyq qorynyń uıymdastyrýymen NEET sanatyndaǵy jastar arasynda ústel tenısinen týrnır ótti, dep habarlaıdy almaty-akshamy.kz.
Buqaralyq sportty damytý jáne jastardy qoldaý maqsatyndaǵy atalmysh sharaǵa bazardan, saýda ortalyqtarynda jumys isteıtin jáne jumyssyz júrgen jastardan 30 qatysýshy baqtaryn synady.
Buǵan deıin «Dúısenbilik sport» jobasy aıasynda Almaty qalasy bazar jastarynyń arasynda shaǵyn fýtboldan jáne voleıboldan týrnır ótken bolatyn.
Saıysqa túsken jastar arasynda bolashaqta úlken dodalarda top jarýdy maqsat etkender de bar.
«Sporttyń adam ómirinde alatyn orny erekshe ekeni bárimizge málim. Almaty qalasynyń NEET sanatyndaǵy jastardyń sportqa degen qyzyǵýshylyǵyn arttyrý maqsatynda jyl saıyn dástúrge aınalǵan «Dúısenbilik sport» jobasyn aıasyndaǵy osy sharaǵa qatysqanymyzǵa qýanyshtymyz! Árıne, bolashaqta úlken dodalarǵa tússek pa degen armanda joq emes», - deıdi Qasymjan Aıdar, «Belgibaı» komandasynyń kapıtany.
Týrnır Almaty qalasy Alataý aýdanyndaǵy ADD ústel tenıs ortalyǵynda ótti.
Atalmysh sharaǵa «Qazyna», «Arlan», «Batyr», t.b saýda ortalyqtarynda jumys isteıtin jastar, NEET sanatyndaǵy, ıaǵnı jumyssyz 30 jas qatysty.
Alǵashqy irikteý kezinde 2 topqa bólinip, ózara baq synady. Shırek fınal men jartylaı fınaldyq saıysqa súrinbeı jetken jastar arasyndaǵy oıyn tartysty ótti.
Zıadýlla Tursynbaev men Onlasyn Aıan Altyn medal men kýbok úshin bar aıla-tásilin qoldanyp-aq baqty. Degenmen 3:2 nátıjesimen Zıadýlla Tursynbaev basym túsip, «Dúısenbilik sport» jobasy aıasynda ótken ústel tenısiniń jeńimpazy atandy. Al úshinshi oryn úshin tartysty oıyn kórsetken Almat Seıtbaev pen Dilmurat Shaıýpov biraz alysty. Degenmen Almattyń bási joǵary bolyp, úshinshi oryn tuǵyrynan kórindi. Ózara baq synasqan týrnır joǵary deńgeıde ótti.
Týrnır qortyndysy boıynsha, birinshi oryn alǵan Zıadýlla Tursynbaev 250 myń teńgeniń, ekinshi oryn alǵan Aıan Onlasynǵa 150 myń teńgeniń, úshinshi oryn alǵan eki qatysýshy Almat Seıtbaev pen Dilmurat Shaıýpovqa 50 myń teńgeniń sertıfıkattary tabys etildi.
Endi aldaǵy ýaqytta «Dúısenbilik sport» jobasy aıasynda NEET sanatyndaǵy jastar arasynda basketboldan keminde 16 komandanyń, al kıbersport boıynsha ár sport túrinen 30 (otyz) qatysýshynyń qatysýymen týrnır uıymdastyrý josparda bar.