Ǵylym jáne joǵary bilim mınıstri Saıasat Nurbek Astana halyqaralyq forýmynyń kýlýarynda Nazarbaev ýnıversıtetin qandaı ózgerister kútip turǵanyn aıtty, dep habarlaıdy Almaty-akshamy.kz.
«Qazirgi tańda tek qana bir ózgeris bar. Nazarbaev ýnıversıteti týraly zań ózgerip jatyr. Úkimettiń, bizdiń mınıstrliktiń negizgi maqsaty – ýnıversıtettiń áleýetin saqtap qalý jáne ony myqty zertteý deńgeıine shyǵarý. Negizgi basym josparymyz – zertteý áleýetin kóterý. Nazarbaev ýnıversıtetinde óte myqty toǵyz zerthana bar. Eń myqty profesorlar, oqytýshylar shoǵyrlanǵan. Maqala turǵysynan, ǵylymı pýblıkasıa turǵysynan eń birinshi deńgeıde tur. Biraq qoldanbaly, salalyq zertteýler azdaý. Shyny kerek ulttyq kompanıalarymyzǵa, salalyq kompanıalarymyzǵa, óndiriske qoldanbaly úlesi áli azdaý», - dedi mınıstr.
Onyń sózinshe, ýnıversıtetti qarjylandyrý tártibi sol kúıinde qalady.
«Avtonomdyq quqyǵy shektelmeıdi. Óıtkeni jınalyp qalǵan potensıaldy shaıqap, tógip almaýymyz kerek. Qalyptasqan kadrlardy, sol jerge quıylǵan aqshanyń arqasynda paıda bolǵan myqty zerthanalardy tógip almaýymyz. Qarjylandyrý tártibi sol kúıinde saqtalady. Biraq qazir analızin jasaýymyz kerek. Sol analızdiń qorytyndysyna qaraı kóremiz. Bilesizder, basshylyǵy aýysady. Úlken konkýrs jarıalanady. Sol konkýrs negizinde ǵana basshylyq taǵaıyndalyp, sodan keıin analız jasalady», - dedi Saıasat Nurbek.