"Órken" bilim berý grantyn endi Tuńǵysh prezıdent emes, memleket basshysy quratyn bolady.
Memleket basshysy Qasym-Jomart Toqaev Nursultan Nazarbaevty óz atymen atalatyn mektepter, JOO jáne qordyń joǵarǵy keńesi basshysy mártebesinen aıyratyn zańǵa qol qoıdy, dep habarlaıdy Almaty-akshamy.kz
"Memleket basshysy "Qazaqstan Respýblıkasynyń keıbir zańnamalyq aktilerine kásibı biliktilik, memlekettik nagradalar, áleýmettik qamsyzdandyrý jáne bilim berý máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń Zańyna qol qoıdy", - delingen Aqorda habarlamasynda.
Zańǵa sáıkes, budan bylaı prezıdent Nazarbaev zıatkerlik mektepteri Joǵaǵry qamqorshylyq keńesiniń, Nazarbaev Ýnıversıtetiniń jáne Nazarbaev Qorynyń basshysy bolady.
Sondaı-aq, jańa zańda prezıdent taǵaıyndaǵan Qazaqstan azamaty da joǵarǵy keńestiń tóraǵasy bola alady delingen. Joǵary qamqorshylyq keńes týraly erejeni Joǵarǵy qamqorshylyq keńestiń tóraǵasy bekitedi.
Budan basqa, qujat taǵy bir ózgeristi kózdeıdi: daryndy balalardy NZM-de oqytýǵa aqy tóleýge arnalǵan "Órken" bilim berý grantyn endi Tuńǵysh prezıdent emes, memleket basshysy quratyn bolady.
Aıta keteıik, buǵan deıin depýtat Snejanna Imasheva Qylmystyq kodeksten burynǵy prezıdent Nursultan Nazarbaevty qorlaý týraly bapty alyp tastaýǵa qatysty túzetýler týraly aıtqan bolatyn.