Qarjy mınıstrligi naqty qandaı nysandar qaıtarylǵanyn aıtpady.
Nursultan Nazarbaev qory ózine tıesili keı nysandardy memleketke qaıtardy, dep habarlaıdy Almaty-akshamy.kz Qarjy mınıstrligine silteme jasap.
Qazirgi ýaqytta respýblıkalyq menshikke tıisti syıǵa tartý sharty negizinde Astana jáne Almaty qalalarynda Qordyń múlki (jıhazdalǵan jáne jabdyqtalǵan jyljymaıtyn múlik nysandary) qabyldandy, - delingen jaýapta.
Alaıda vedomstvo eks-prezıdent qorynyń memleketke naqty qaı nysandardy qaıtarǵanyn jáne onyń jalpy somasyn ashyp aıtpady. Mınıstrlik ókili bul aqparatty «qupıa» dep túsindirdi.
Esterińizge sala keteıik, Qazaqstan Respýblıkasy Tuńǵysh Prezıdenti – Elbasynyń Qory «Qazaqstan Respýblıkasy Tuńǵysh Prezıdenti – Elbasy týraly» Qazaqstan Respýblıkasynyń Konstıtýsıalyq Zańynyń 9-babyn oryndaý úshin Qazaqstan Respýblıkasy Prezıdentiniń 2000 jylǵy 22 jeltoqsandaǵy № 528 Jarlyǵyna sáıkes quryldy. Bul rette osy Jarlyqtyń 3-tarmaǵynda Qor áleýmettik, qaıyrymdylyq, mádenı, bilim berý jáne ózge de qoǵamdyq paıdaly maqsattardy kózdeıtin komersıalyq emes uıym. Qordyń qarjylandyrý kózderi zańdarǵa qaıshy kelmeıtin jarnalar men túsimder dep belgilengen.
2020 jyly atalǵan qor Nursultan Nazarbaev qory bolyp ózgertildi.
«Memlekettik emes zańdy tulǵalardyń múlkin memlekettik menshikke óteýsiz negizde berý tártibi Qazaqstan Respýblıkasy Úkimetiniń 2011 jylǵy 28 qyrkúıektegi № 1103 qaýlysymen bekitilgen Syıǵa tartý sharty boıynsha memlekettiń múlik quqyǵyna ıe bolý qaǵıdasymen retteledi, onyń 2-tarmaǵyna sáıkes memleketke Syıǵa tartý sharty boıynsha múlik quqyǵyn berý týraly sheshimdi múliktiń menshik ıesi qabyldaıdy jáne zańnamada belgilengen tártippen resimdelýi tıis», - delingen resmı jaýapta.
Sonymen qatar, Komısıanyń jumysy bastalǵannan beri telekomýnıkasıa, temirjol ınfraqurylymy, ekologıa jáne t. b. salalardaǵy jeke monopolıalardy (olıgopolıalardy) alyp tastaý maqsatynda syıǵa tartý sharttary boıynsha respýblıkalyq menshikke:
10 AQ jáne JSHS aksıalar paketi men qatysý úles;
5 jyljymaıtyn múlik nysany;
100 mln AQSH dollary men 1,49 mlrd teńge qabyldandy.
Atap aıtqanda, respýblıkalyq menshikke telekomýnıkasıa salasynda «Qazaqtelekom» AQ-da (28,8%), temirjol ınfraqurylymy salasynda – «Kóliktik servıs ortalyǵy» AQ-da (100%; múlik quramynda jalpy uzyndyǵy shamamen 250 shaqyrym bolatyn 400-den astam kirme temirjol qabyldanǵan), ekologıa salasynda «Halyqaralyq jasyl tehnologıalar jáne ınvestısıalyq jobalar ortalyǵy» QEAQ (50% + 1 aksıa), «Operator ÓKM» JSHS (100%) aksıalar paketi qabyldandy. Respýblıkalyq menshikke qabyldanǵan jyljymaıtyn múlik obektileriniń qatarynda Almaty qalasyndaǵy sporttyq-jattyǵý kesheni, Astana qalasyndaǵy «Bolashaq» bıznes ortalyǵynyń ǵımaraty jáne t. b. bar.
Komısıa qabyldaǵan sheshimder týraly qoǵam turaqty negizde, onyń ishinde áleýmettik jeliler arqyly habardar etiledi, – deıdi mınıstrlik.