Naýryzbaı aýdany turǵyndarymen kezdesý barysynda jergilikti halyq Almaty ákimine mańyzdy máseleni – Taýsamaly shaǵyn aýdanyndaǵy kóshe jaryǵy ornatýdy sheshkeni úshin alǵys aıtty, dep habarlaıdy aqshamnews.kz
Turǵyndardyń biri eki jyl buryn osyndaı kezdesýge qatysyp, kóshe jaryǵy máselesin kótergenin aıtty.
«Sol kezde siz bul máseleni qarastyramyz dep ýáde berdińiz. Búgin kóshemizdiń turǵyndarynyń ótinishi boıynsha sizge alǵys aıtýǵa keldim. Suranysymyzdy nazardan tys qaldyrmaı, jumysty oryndaǵandaryńyz úshin rahmet. Qazir kósheler jaryq, júrý qaýipsiz. Sizge jáne ákimdikke eńbekterińiz úshin alǵysymyzdy bildiremiz, múmkindiginshe barlyq máselemiz sheshilip jatyr», – dedi turǵyn.
Óz kezeginde shahar basshysy Naýryzbaı aýdanynyń qajettiligine erekshe nazar aýdarý mańyzdy ekenin atap ótti.
«Naýryzbaı aýdanyn erekshe jaqsy kóremin, óıtkeni bul qalanyń eń jas aýdany, sondyqtan biz oǵan erekshe kóńil bólýimiz kerek. Turǵyndar bizdiń jumysymyzdyń sapasyna rıza bolatyn osyndaı kishigirim jeńister kóbeıe bersin», – dedi Erbolat Dosaev.
Ákimniń aıtýynsha, bıyl aýdannyń tolyq jaryqtandyrylýyn qamtamasyz etý úshin, onyń ishinde burynǵy saıajaı alaptaryndaǵy kóshelerge jaryq júrgizý úshin búdjetten qosymsha 1,3 mlrd teńge bólinedi.