Naýryzbaı aýdanynda qurylys údep, turǵyndardyń sanynyń ósýine baılanysty áleýmettik ınfraqurylym da qosa damyp jatyr. Jyldyń sońyna deıin Quramys yqsham aýdanynda eki mańyzdy nysan – 1500 oryndyq jańa mektep pen 320 oryndyq balabaqsha paıdalanýǵa berilmek. Al 2026 jyldyń mamyrynda 500 adamǵa arnalǵan emdik-dıagnostıkalyq ortalyǵy bar emhana da salynyp bitedi. Óńirlik komýnıkasıalar qyzmeti uıymdastyrǵan pres-sapar kezinde Naýryzbaı aýdanynyń ákimi Nazıra Toǵyzbaeva osy úsh nysandaǵy jumys barysyn tanystyrdy.
«Keleshek mektep» ulttyq jobasy aıasynda Quramys yqsham aýdanynda jańa mekteptiń qurylysy júrip jatyr. Bul oqý ornynda 1500 oqýshy bilim alady. Mektep qurylysy aýdandaǵy oqýshy ornynyń tapshylyǵyn eskere qolǵa alynǵan, óıtkeni 2024–2025 oqý jylynda shamamen 5000 oryn jetispeıdi. Qazir aýdan boıynsha 32 myńnan astam bala oqıtyn 12 memlekettik mektep jumys isteıdi. Bul nysannyń qurylys jumystary 2023 jyldyń tamyz aıynda bastaldy.
«BCN Group» kompanıasynyń birinshi vıse-prezıdenti Talǵat Janseıitovtyń aıtýynsha, jumystyń 95%-y bitken.
«Qurylys alańy 2,3 ga, mektep №219 1500 orynǵa arnalǵan. Qurylys aıaqtalyp qaldy. Joba quny - 7,9 mlrd teńge, qarjy 85% ıgerildi. 1-2 tamyzǵa deıin qurylys-montaj jumysy aıaqtalyp, keıin ótkizemiz ony. Pýskonaladka jumystary 1-2 aptaǵa sozylady, munda jeldetý, sý qubyry, káriz, jylytý júıeleri men mektepke qajetti jabdyqtar ornatylady. Mektepte eki úlken sport zal, úsh kishi sport zal, horeografıa zaly, 325 oryndyq akt zaly men 365 oryndyq asqana bolady. Nysannyń jalpy aýmaǵy 14 500 sharshy metr», - dep atap ótti Talǵat Janseıitov.
Alaıda, ǵımaratqa aparar jol ázirge bitpegen. Qalalyq mobıldilik basqarmasy jol salýǵa jelidegi jumys aıaqtalǵannan keıin kirispek. Astana kóshesinen Seıdimbek kóshesine deıin jol salyp, Ortalyq kóshesin aıaqtaý qajet, mundaǵy jeke úılerdi satyp alyp, buzatynyn buzady. Mekteptiń mańyndaǵy jaıaý júrginshiler jolyndaǵy gaz qubyryn da tereńdetpek.
Quramys yqsham aýdanynda taǵy 320 oryndyq balabaqsha salynyp jatyr. 2025 jyldyń mamyr aıynyń sońyna qaraı nysan 65%-ǵa daıar bolǵan. İshki ınjenerlik jeliler, shatyr men árleý jumystary aıaqtalyp qalsa (70%), qasbeti 50%-ǵa bitken. Qazir aýmaqty kógaldandyryp, qorshaýǵa kiristi.
Úshinshi nysan, 500 kelýshige arnalǵan emdik-dıagnostıkalyq ortalyǵy bar emhananyń qurylysy 2025 jyldyń naýryzynda bastalǵan. Joba quny 8,9 mlrd teńge, onyń 2,5 mlrd teńgesi zamandyq medısınalyq jabdyq satyp alýǵa jumsalady. Qurylys 2026 jyldyń mamyr aıynda aıaqtalmaq. Emhana ashylǵannan keıin, Quramys yqsham aýdanynyń turǵyndary dárigerdiń kómegine júginý úshin alysqa barmaıdy, bul №26 qalalyq emhanaǵa túsetin salmaqty da azaıtady.
«Maýsym aıynda qurylysqa ruqsat alyndy. Bir aıdyń ishinde daıarlyq pen qazba jumysyn júrgizip, irgetastyn ázirledik. Qazir úsh bloktyń qurylysy júrip jatyr, aldaǵy bir aıda jumys aıaqtalady. Joba boıynsha bes bloktan turatyn osy zamanǵy emhana salynady, onda dárigerlik qyzmettiń barlyq túri bolady. Munda qabyldaý, jedel járdem bólimi, stasıonar men turǵyndardy qabyldaıtyn kabınetter ornalasady» - deıdi «MIR-A Construction» kompanıasynyń bas ınjeneri Valerıı Ilnıskıı.
Osylaısha, Naýryzbaı aýdanynyń turǵyndaryna arnap aldaǵy bir jarym jyl ishinde jańadan bilim berý men medısına mekemesi salynyp, bul aýdannyń qarqyndy áleýmettik ınfraqurylymyn aıtarlyqtaı jaqsartpaq