Bıylǵy maýsym aıynda Shuǵyla yqsham aýdanynda uzyndyǵy 370 metr bolatyn osy zamanǵy jaıaý júrginshiler aımaǵyn qurý jumysy bastaldy. Bul joba qalalyq ınfraqurylymdy damytý men aýdan turǵyndarynyń ómir sapasyn jaqsartýǵa arnalǵan mańyzdy qadam bolmaq. Óńirlik komýnıkasıalar qyzmeti uıymdastyrǵan pres-týr barysynda Naýryzbaı aýdanynyń ákimi Nazıra Toǵyzbaeva osylaı dep habarlady.
«Shuǵyla City» turǵyn úı kesheniniń aýmaǵynda jaıaý júrginshiler aımaǵyn salý - aýdandaǵy abattandyrýdyń negizgi elementiniń biri. Jaıaý júrginshiler men serýendeýge arnalǵan aımaq qurýdy kózdeıtin jobada 2000 m² alańdy alyp jatqan trotýar joly men 1200 m² velojol da bolady. Sonymen qatar, aýmaqta balalardyń oıyn alańy, basketbol alańy, vorkaýt aımaǵy men shaǵyn amfıteatr ornatylady.
««Shuǵyla City» turǵyn úı keshenindegi úıler bizge memlekettik baǵdarlama aıasynda berildi. Turǵyndardyń jaıly ómir súrýine jaǵdaı jasaý úshin biz aýmaqty abattandyryp, sonyń ishinde jaıaý júrginshiler aımaǵyn qurýdy da qolǵa aldyq. Bular jańa ýrbanıstıkalyq nysandardy abattandyrý baǵdarlamasy aıasynda istelip jatyr. Bıyl «Halyq qatysatyn búdjet» baǵdarlamasyna 2,5 mıllıard teńge bólindi, bul 34 túrli jobany júzege asyrýǵa múmkindik beredi. Olardyń ishindegi eń aýqymdysy - jaıaý júrginshiler aımaǵyn abattandyrý, qurylys pen montajdaý jumysynyń quny 450 mıllıon teńgeni quraıdy. Maqsatymyz - bul aımaqty adamdarǵa yńǵaıly da jaıly etip, turǵyndardyń qaýipsizdigin qamtamasyz etý, sondaı-aq, adamdardyń ómir súrýine qolaıly qylý», - deıdi aýdan ákimi Nazıra Toǵyzbaeva.
Abattandyrý barysynda kóshe jıhazdary men kishi sáýlet nysandary ornatylyp, avtomattandyrylǵan sýarý júıesi men kóshelerdi jaryqtandyrý baǵanalary ornatylady. Qurylys jumystary qarasha aıyna deıin aıaqtalyp qalady.
«Jasyl aımaqtyń jalpy aýdany 6320 m² bolady, 198 m² jańa trotýar plıtkasy tóseledi, sondaı-aq 85 m² sement-qum bordúrlary qaıta jóndeledi. Aýlalarda oıyn alańdary az, sondyqtan yńǵaıly keńistik qurý úshin oıyn alańdaryn jabdyqtamaqpyz. Olar jasqa qaraı bólinedi: 4-ten 12 jasqa deıingi balalarǵa arnalǵan jeke alańdar, sondaı-aq 12-16 jas aralyǵyndaǵy jasóspirimderge arnalǵan alańdar qarastyrylatyn bolady. Sonymen qatar, biz serýendeýge arnalǵan aımaq quryp, adamdardyń ýaqytyn jaıly ótkizýine múmkindik jasaımyz», - dep atap ótti Naýryzbaı aýdanynyń ákimi Nazıra Toǵyzbaeva.
Jaıaý júrginshiler aımaǵy 44 kópqabatty turǵyn úıge jaqyn ornalasyp, 12 myńnan astam aýdan turǵyndarynyń erkin demalýyna jaǵdaı jasamaq.