Naýryzbaı aýdanynda kóshe-jol jelisin qaıta jańartý men qurylys jumystary jalǵasyp jatyr. Aldaǵy eki jylda 100 shaqyrym jol jańartylyp, trotýarlar men aryqtar salynyp, aýdandaǵy kólik baılanysy qalypqa kelmek. Óńirlik komýnıkasıalar qyzmeti uıymdastyrǵan baspasóz konferensıasynda aýdan ákimi Nazıra Toǵyzbaeva osylaı dep málimdedi.
Naýryzbaı aýdanynda jol ınfraqurylymyn damytý jobalary júıeli túrde iske asyp jatyr. Byltyr 21 kóshede 15 shaqyrym jolǵa ortasha jóndeý júrgizilip, oǵan 1,1 mıllıard teńge bólingen. 2025 jyly taǵy 35 kóshede 47 shaqyrym joldy jańartady, osy maqsatqa 3,2 mıllıard teńge bólindi.
Ótken jyly Aqjar shaǵyn aýdanynda 10 kóshede 6 shaqyrym jańa jol salynyp, jumys quny 400 mıllıon teńge boldy. 2025 jyldyń mamyr aıynan bastap Aqjar men Shuǵyla shaǵyn aýdandarynda jańa jol salýdy bastap, ınjenerlik jelilerdiń qurylysy aıaqtaldy.
2024 jyly aýdandyq jol jelisiniń sapasyn arttyrý úshin 50 myń sharshy metr jol jabyndysy qaıta jóndelip, 1,7 shaqyrym aryq jelisi salyndy. 2025 jyly bólingen 850 mıllıon teńgege taǵy 45 myń sharshy metr jol jabyndysyn jóndep, 10 kóshede 4,5 shaqyrym trotýar salyp, 4 kóshede 5 shaqyrym bolatyn aryq tartý jumysy josparlanǵan.
«Birinshiden, aýdannyń basqa qalalyq jáne oblystyq aımaqtarmen kólik baılanysyn jaqsartý basty mindetimizdiń biri bolyp qaldy. Úlken joldar salýdy qolǵa aldyq. Osylaısha, Abaı dańǵylyn Stroıtelnaıa kóshesinen Altyn Orda kóshesine deıin 600 metrge deıin keńeıtý jobasy júzege asyrylyp jatyr. Joba quny – 3,5 mıllıard teńge. 73 jer ýchaskesin satyp alýdy aıaqtadyq, bıyl jyl sońyna deıin qurylys jumystary tolyq bitedi», - dedi Nazıra Toǵyzbaeva.
Sondaı-aq Tóle bı men Jubanov kóshesinde ınjenerlik jelilerdi kóshirý men jer ýchaskelerin satyp alý jumysy júrip jatyr. Tóle bı kóshesindegi 270 ýchaskeden 211-i satyp alyndy. Qalǵan ýchaskeler 2025 jylǵa deıin satyp alynyp, barlyq qurylys-montaj jumystary aıaqtalady. Bul jobany iske asyrý úshin 19,2 mıllıard teńge bólindi. Jubanov kóshesinde 346 ýchaskeniń 75-i satyp alyndy, qalǵanyn baǵalaý jumysy aıaqtalyp qaldy. Bul jobany aıaqtaý quny 13,1 mıllıard teńge, 2026 jyldyń qarasha aıyna josparlanǵan.
Barlyq qurylys pen joldardy jańalaý jumystaryn jer ýchaskelerin satyp alý men menshik ıelerimen kelisýdi eskere otyryp istep jatyrmyz. Jol jelisin keshendi jańartý kólik qatynasyn arttyryp qana qoımaı, Naýryzbaı aýdanyndaǵy turǵyndardyń júrip-turýyn yńǵaıly ári qaýipsiz etedi.