Naýryzbaı aýdanynda «Halyq qatysatyn búdjet» baǵdarlamasy men qalalyq bastamalardyń arqasynda jyldyń sońyna deıin 80-nen astam abattandyrý, kógaldandyrý men ınfraqurylymdy damytý jobasy júzege asady. Óńirlik komýnıkasıalar qyzmetinde aýdan ákimi Nazıra Toǵyzbaeva osylaı dedi.
«2024 jyly «Halyq qatysatyn búdjet» arqyly 10 qoǵamdyq keńistik pen eki aýlaǵa 2,5 mıllıard teńge bólindi. Ol qarjy trotýar salyp, avtosýarý júıesin ornatyp, kógaldandyrý men jaryqtandyrýǵa, asfált tósep, qorshaý ornatý jumystaryna jumsaldy. Bıyl qarjylandyrý kólemi saqtaldy, qazir turǵyndardan túsken 1300-den astam usynystyń arasynan iriktelip alynǵan 34 jańa joba iske asyrylyp jatyr», - deıdi Nazıra Toǵyzbaeva.
Qazir Shuǵyla turǵyn úı kesheninde jaıaý júrginshiler jolyn abattandyrý men qoqys alańdarynyń qurylys karkastaryn ornatyp jatyr. Jandosov kóshesinde joldy keńeıtip, trotýarlar salyp, avtosýarý júıesin qurý jumystary qolǵa alyndy. Tastybulaq ózeniniń boıynda uzyndyǵy 1,4 shaqyrym bolatyn jaıaý júrginshiler joly jasalyp jatyr.
Jyl sońyna deıin Alataý dańǵyly men Sábdenov kóshesin abattandyryp, Jandosov kóshesinen Aqsaı ózenine deıingi Sapojnıkov ózeniniń arnasyn nyǵaıtý men Qarǵaly ózeniniń Raıymbek dańǵylyna deıingi jaǵalaýyn abattandyrý jaǵy josparlanǵan.
Sonymen qatar, Abaı dańǵyly men Qonaev, Alataý, Áshimov, Shalápın sıaqty úlken-úlken kóshelerde sándep jaryqtandyrýdy qolǵa almaq.
Qalalyq «Dızaın-kod» konsepsıasy aıasynda 20 kópqabatty úıdiń qasbetin jóndeý jumystary bastaldy. Sonymen qatar, ótken jylmen salystyrǵanda jóndeletin aýlalar sany úsh esege artyp, 16-dan 47-ge deıin kóbeıgen.
Aýdan áleýmettik ınfraqurylymdy da belsendi túrde jańartyp jatyr. Jeńistiń 80 jyldyǵyna oraı №187 mektep aýmaǵy abattandyrylyp, «Máńgilik alaý» monýmenti ornatyldy. Aqjar shaǵyn aýdany men Zımanov kóshesinde balalar men sport alańdaryna kúrdeli jóndeý jasaldy. Aıtmatov kóshesinde jańa qorshaý ornatylyp, aryq júıesi men sport jabdyqtary jańartyldy. Qosymsha bólingen 200 mıllıon teńge Qarǵaly, Abaı, Raıymbek, Karernaıa men basqa da kósheler boıynsha jobalardy iske asyrýǵa múmkindik beredi.
Ýsıkov kóshesinde syrǵymaly jáne sý tasqyny qaýpi bar aýmaqtardy nyǵaıtý jumystary aıaqtaldy, bul kúshti jaýyn-shashyn kezinde oqys oqıǵanyń aldyn alýǵa múmkindik beredi.
«Barlyq jumystar qaladaǵy jaıly orta konsepsıasy aıasynda júzege asyrylyp, turǵyndardyń qoldaýymen júrgizilip jatyr. Biz aýdanymyzdy abattandyryp qana qoımaı, ony qaýipsiz etýge de tyrysyp jatyrmyz», - dep atap ótti Nazıra Toǵyzbaeva.