Naýryzbaı aýdany úlken jobalardy júzege asyryp jatyr. Sý tartý, káriz ben sý qubyry jelisiniń qurylysy on myńdaǵan turǵyndy sapaly aýyzsýmen qamtamasyz etedi. Óńirlik komýnıkasıalar qyzmetiniń baspasóz konferensıasynda aýdan ákimi Nazıra Toǵyzbaeva osylaı deıdi.
Naýryzbaı aýdanynyń damýynyń negizgi baǵytynyń biri – osy zamanǵy sapaly ınjenerlik ınfraqurylymmen keshendi qamtamasyz etý. 2025 jyly aýyzsý men káriz júıesin damytýdy kózdeıtin úlken jobalar iske aspaq.
2024 jyldyń naýryzynda bastapqyda «Qarǵaly» súzgi stansıasy jobasynda qarastyrylmaǵan 8,6 shaqyrym káriz kolektorynyń qurylysy aıaqtaldy. Bul joba 50 myńnan astam turǵyndy sapaly aýyzsýmen qamtamasyz etýge múmkindik bermek.
Bıylǵy qarasha aıynda táýligine 22 myń tekshe metr sý ótkizýge qabiletti «Aqsaı» sý tartý nysanynyń qurylysy aıaqtalady. Nysannyń jalpy quny - 29,7 mlrd teńge. Qazir jumystyń 80%-y aıaqtalǵan. Sonymen qatar, sý tartý nysanyna aparatyn 9 shaqyrym jol men 5 kópir taǵy salynyp jatyr, súzgi stansıasynda iske qosý-jóndeý men tehnologıalyq jumystardy qatar qolǵa alǵan. Bul strategıalyq mańyzdy nysan aýdannyń batys bóligi men oblystyń Qarasaı aýdanyndaǵy 150 myń adamdy aýyzsýmen qamtamasyz etedi.
«Aqjar» jobasynyń (ekinshi kezeń) aıasynda 2024 jyly 14 shaqyrym sý qubyry men 12 shaqyrym káriz jelisi salyndy. 2025 jyly bul jumystar jalǵasyp, taǵy 17 shaqyrym sý qubyry men 15 shaqyrym káriz jelisi salynyp jatyr. Sonymen qatar, jobanyń úshinshi kezeńi de iske asyrylyp, qosymsha 1,7 shaqyrym sý qubyry men 1,3 shaqyrym káriz júıesi salynbaq.
«Qaraǵaıly» jobasynyń birinshi kezeńi aıasynda 2024 jyly 1,6 shaqyrym sý qubyry men 800 metr káriz jelisi salyndy. 2025 jyly taǵy 2,6 shaqyrym sý qubyry men 1,3 shaqyrym káriz jelisi qosylady. Qazir jobanyń ekinshi kezeńine arnalǵan jobalyq-smetalyq qujattama ázirlenip jatyr.
Buǵan qosa, «Tastybulaq» pen «Taýsamaly» jobasy (birinshi kezeń) memlekettik saraptamadan oń qorytyndy aldy. Bul jobalar boıynsha josparlanǵan jumystyń jalpy aýqymy - 9,6 mlrd teńge.
«Atalǵan jobalar aýdannyń ornyqty damýyna qajetti myqty ınjenerlik negiz qalyptastyryp, turǵyndardyń jaıly ómir súrýi men qaýipsizdigin arttyrady. Sondaı-aq, qalalyq ınfraqurylymdy júıeli túrde damytýǵa baǵyttalǵan naqty qadamdardy kórsetedi», - deıdi Nazıra Toǵyzbaeva.