Almatyda bir kúnde birneshe aýqymdy konsert ótti
Bıyl Almatyda Naýryz merekesi erekshe naqyshta atalyp ótip jatyr. Áz-Naýryz meıramyn toılaý keshendi túrde jalǵasýda. Qala turǵyndaryna merekelik kóńil-kúı syılaý maqsatynda estrada juldyzdarynyń qatysýymen konsertter uıymdastyryldy.
Alǵashqy konsertimiz «Astana alańynda» ótti. Merekelik is-sharada Qurmanǵazy atyndaǵy Qazaq memlekettik akademıalyq halyq aspaptar orkestiriniń avtorlyq konserttik baǵdarlamasy júrgizildi. Sonymen qatar, «Saltanat», «Uly dala» ansamblderi, Aıjan Nurmaǵambetova, Qudaıbergen Bekish, Baqtıar Taılaqbaev jáne basqa da ártister óner kórsetti.
Nóserlep jaýǵan jańbyrǵa qaramastan merekege jınalǵan qalyń jurtshylyqtyń kóńil-kúıleri kóterińki boldy.
– Konsert óte qyzyqty ótýde. Ózim tanymal juldyzdardy kórip qýanyp otyrmyn. Ásirese, qazaqı ári halyq ánderin súıip tyńdaımyn. Kóńil-kúı kóterińki. Sebebi, búgin erekshe meıram. Qazaqtyń jańa jyly bolyp jatyr. Barlyq qazaqstandyqtarǵa mereke qutty bolsyn. Naýryz oń bolsyn, berekeli jyl bolǵaı, – dedi qala turǵyny Alıa Muratqyzy.
Halyqtyń yqylasy erekshe boldy. Al, Jibek joly dańǵyly men Panfılov kóshesiniń qıylysynda ótken konsert tipten erekshe boldy. Dál osy jerde etno-folklorlyq ujymdar óner kórsetti. Túrli aspaptar arqyly óner kórsetken ónerpazdarǵa halyqtyń yqylasy zor boldy. Ulttyq aspaptarda óner kórsetkender tyńdarmannyń qulaq quryshyn ábden qandyra aldy.
– Búgingi kún óte erekshe, ári qyzyqty ótýde. Naýryz bizdiń qazaqtyń jańa jyly, barlyq jaqsylyq pen molshylyqty nasıhattaıtyn aı. Bıylǵy jyly naýryz merekesi jyldaǵydan erekshe ótkeni tipten keremet. Kádimgideı, merekelik kóńil-kúı paıda bolyp. Aınalamyzdaǵy adamdardyń bári kóńildi bolyp júrgenin kórgen qandaı jaqsy. Ózime mýzykalyq aspaptar qatty unaıdy. Sonyń ishinde, dombyrada oınaı alamyn. Al, búgin myna etno-folklorlyq ujymdardyń dombyrada oınaǵanyn kórip, qatty tań qaldym. Deńgeıleri, birshama joǵary ekeni kórinip tur, – dedi qala turǵyny Arman Alpysbaı.
Kórermender súıikti ánderin qosyla shyrqady.
Sonymen qatar, Temirbek Júrgenov atyndaǵy óner akademıasynyń aldynda da, konserttik baǵdarlama uıymdastyryldy. Onda da halyqtyń qarasy kóp boldy. Tanymal estrada juldyzdary án shyrqasa, kórermender súıikti ánderin qosyla shyrqady.
Áni men jyry jarasqan jerde halyqtyń rızashylyǵyn sózben jetkizý qıyn. Kúnniń sýyqtyǵyna qaramaı, konsertke jınalǵan adamdar bir-birin naýryz merkesimen quttyqtap jatty.
