Robot-gýmanoıdtar almatylyqtar men qala qonaqtaryn Naýryz meıramymen quttyqtap júr
Almatyda Panfılov jaıaý júrginshiler kóshesinde, Qabanbaı batyr kóshesinen bastap Tóle bı kóshesine deıingi alańda, gýmanoıdty robottardy kezdestirýge bolady. Olar qala turǵyndary men qonaqtaryn Naýryz meıramymen quttyqtap, merekelik kóńil-kúı syılap júr. Dástúrli taqıa men shapan kıgen robottar kóshede erkin serýendep, balalardyń ǵana emes, eresekterdiń de qyzyǵýshylyǵyn týdyrdy, dep habarlaıdy aqshamnews.kz
Qala turǵyndary gýmanoıdtarmen estelik sýretke túsip, bılep, qol alysyp amandasyp, olardy vıdeoǵa túsirip jatyr.
Sonymen qatar, Panfılov kóshesinde eski plasık zattardan jasalǵan stasıonarlyq robottar da qoıylǵan. Olar da ózine erekshe nazar aýdaryp, kórermenderdiń qyzyǵýshylyǵyn týdyrdy.
Budan bólek, merekelik alańda daıashy-robottar, robot-aspaz jáne barısta-robot jumys isteýde. Olar baýyrsaq daıyndap, qonaqtarǵa kofe usynyp, tapsyrystardy jetkizýde. Qala turǵyndary men týrıser olardyń qyzmetin qýana paıdalanyp jatyr.
Panfılov kóshesiniń ortasyna jaryqdıodty ekrandarmen jabdyqtalǵan kınetıkalyq týnel ornatyldy. Bul art-nysan jarqyn reńkti oıý-órnekter arqyly ótip bara jatqan adamdardyń qımyldaryn qaıtalaıdy, bul nysan foto men beınetúsirilimder úshin erekshe fonǵa aınaldy.
Merekelik alańda sadaq atyp, vırtýaldy formatta mergendik qabiletti synaýǵa múmkindik bar. Sondaı-aq, VR-garnıtýra arqyly ótken ǵasyrlarǵa saıahat jasaýǵa bolady. Jasandy ıntellekt tehnologıasyn qoldana otyryp, ulttyq naqyshta óńdelgen fotosýretke túsip, ony birden telefonǵa júkteýge bolady.
Zıatkerlik oıyndardy unatatyndar «Oı-Dýman» shoýyna qatysyp, robototehnıka kórmesin tamashalaı alady.
Aıta keterligi, bul alańda vırtýaldy avatar – Ǵalymjan da bar. Ol Naýryz meıramyn atap ótip júrgen almatylyqtardyń suraqtaryna jaýap berip, is-sharalar baǵdarlamasy týraly aqparat usynyp, halyqpen áńgimelesip, quttyqtaý tilegin jaýdyrýda.
Osy Nauryz Almaty Vibe festıvali arqyly Panfılov kóshesi jańa tehnologıalar men dástúrlerdiń ádemi úılesken erekshe ortalyǵyna aınaldy. Bul festıvál 21-22 naýryzda saǵat 10:00-den bastap 22:00-ge deıin jalǵasady. Kelip, robottarmen júzdesýge asyǵyńyzdar. Bılet alýdyń qajeti joq, barlyǵy tegin.
Sonymen qatar, jaıaý júrginshiler kóshesinde sahna ornatylyp, onda laıv-bendter men dıdjeıler óner kórsetip, qala turǵyndary men qonaqtaryna erekshe merekelik atmosfera syılaýda.