2020 jyly shegilmeıtin temeki buıymdaryn ákelýge, óndirýge, satýǵa jáne taratýǵa tolyq tyıym salyndy.
Nasybaı satqandar bes jylǵa deıin bas bostandyǵynan aıyrylýy múmkin, dep habarlaıdy Almaty-akshamy.kz
«Nasybaıdy tutynýdyń adam aǵzasyna tıgizetin keri áserin eskere otyryp, 2020 jyly shegilmeıtin temeki buıymdaryn, onyń ishinde nasybaıdy ákelýge, óndirýge, satýǵa jáne taratýǵa tolyq tyıym salyndy («Halyq densaýlyǵy jáne densaýlyq saqtaý týraly» kodeksiniń 110-babynyń 9-tarmaǵy)», - dedi Qazaqstan Respýblıkasy premer-mınıstriniń orynbasary Tamara Dúısenova.
Onyń málimdeýinshe, bul normany buzǵany úshin 25 aılyq eseptik kórsetkish mólsherinde ákimshilik aıyppul qarastyrylǵan («Ákimshilik quqyq buzýshylyq týraly» kodekstiń 196-baby).
«Alaıda nasybaıdy zańsyz satý jáne taratý boıynsha jaýapkershilikti qataıtý maqsatynda «Densaýlyq saqtaý salasyndaǵy keıbir zańnamalyq aktilerge ózgerister men tolyqtyrýlar engizý týraly» parlament qabyldaǵan zańda shegilmeıtin temeki buıymdaryn ákelý, óndirý, satý jáne taratý úshin qylmystyq jaýapkershilik kózdeldi (satý jáne taratý úshin – 200 AEK mólsherinde aıyppul salý nemese 200 saǵatqa deıin qoǵamdyq jumystarǵa tartý, ne 50 táýlikke deıin qamaýǵa alý; ákelý, óndirý úshin – 2000 AEK-ke deıingi mólsherde aıyppul salýǵa, ne 600 saǵatqa deıingi merzimge qoǵamdyq jumystarǵa tartýǵa, ne eki jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýmen nemese onsyz múlkin tárkileý)», - dep habarlady úkimet basshysynyń orynbasary.
Dúısenova birneshe ret nemese asa iri mólsherde tabys alýmen baılanysty qylmystyq top jasasa – 5000 AEK deıingi mólsherde aıyppul salýǵa ne 1200 saǵatqa deıingi merzimge qoǵamdyq jumysqa tartýǵa ne múlki tárkilenip bes jylǵa deıingi merzimge nemese sol merzimge bas bostandyǵynan aıyrýǵa jazalanatynyn aıtty.
Vıse-premer zańǵa engizilgen normalardy halyq arasynda túsindirý boıynsha tıisti profılaktıkalyq is-sharalar ótkizilip jatqanyn eskertti.