Almatydaǵy "Dınamo" stadıonynda nashaqorlyqqa qarsy jarnamalardy joıý maqsatynda "Nashaqorlyqqa jol joq" atty keń aýqymdy jalpyqalalyq naýqan uıymdastyryldy.
Sharanyń maqsaty – qoǵamnyń nazaryn esirtki jarnamasynyń taralý máselesine aýdarý, azamattyq belsendi ustanymdy qalyptastyrý jáne jastardy qala keńistigin esirtki aınalymyn nasıhattaıtyn jazbalar men ınternet-siltemelerden tazartý isine jumyldyrý.
- Esirtki jarnamasy – bul táýeldilikke aparar alǵashqy qadam. Ol qylmysqa ıtermeleıdi jáne adam ómirin buzady. Sondyqtan árbir almatylyq mundaı jazbalardy kórse beıjaı qaramaı, habar berýi mańyzdy. Bul – qalanyń qaýipsizdigine qosqan jeke úles. Almaty esirtki men onyń nasıhatynan azat qala bolýy tıis. Al bul nátıjege tek polısıa men turǵyndar birlese áreket etkende ǵana qol jetkizýge bolady, – dedi Almaty qalasy polısıa departamentiniń esirtki qylmysyna qarsy kúres basqarmasynyń bastyǵy Murat Jumabaev.
Naýqanǵa qatysýshylar qala aýdandaryna bólinip, qabyrǵalar, qorshaýlar men jerasty ótkelderindegi messendjer nómirleri men esirtki satýǵa qatysty aqparat taratatyn ınternet-siltemeler jazylǵan jazbalardy óshirý jumystaryn júrgizdi. Jalpy naýqanǵa myńǵa jýyq adam – stýdentter, eriktiler men qoǵamdyq uıym ókilderi qatysty. Birlesken jumystyń nátıjesinde eki myńnan astam esirtki jarnamasy joıylyp, olardyń barlyǵy buǵattaý úshin ýákiletti organdarǵa joldandy.