Qaıǵyly oqıǵa Qyzyl teńiz jaǵalaýynda ornalasqan Marsa-Alam qalasynyń jaǵajaıynda oryn aldy. ANSA basylymynyń málimetine súıensek, shabýylǵa ushyraǵan týrıser Italıa azamattary bolǵan, dep habarlaıdy aqshamnews.kz
Qaza tapqan Djanlýka Dı Djoıa 48 jasta edi. Al jaraqat alǵan 69 jastaǵy Peppıno Fappanı akýlany qýyp jibermek bolyp sýǵa sekirgen. Onyń qoly men aıaǵynan jaraqat alǵany belgili boldy. Alaıda Corriere basylymy bul jaraqattardyń aýyr emes ekenin jáne er adamnyń jaqynda aýrýhanadan shyǵatynyn jazdy.
Jábirlenýshiniń áıeli olardyń betmaskamen sý astyn kórýmen (shnorklıng) júzýge ruqsat etilgen jerde júrgenin aıtady. Alaıda Mysyr bıligi akýlanyń týrıserge ruqsat etilmegen aýmaqta shabýyl jasaǵanyn málimdedi.
Búgin, 30 jeltoqsan kúni, jaǵajaı eki kúnge jabylady. Oqıǵanyń mán-jaıyn anyqtaý úshin jergilikti bılik arnaıy komısıa qurdy.