Almaty - túrli bıznestiń toǵysqan jeri. Aqshań bolsa janyńa kerektiń bári tabylatyn qalada adamǵa ǵana emes, janýarlarǵa da jaǵdaı jasalǵan. Álemdik juldyzdar tańdap ornalasatyn qymbat qonaqúıge toly shaharda mysyqtarǵa da arnalǵan qonaqúı bar. Aqshamnews.kz tilshisine suqbat bergen NEKOTYAN qonaqúıiniń áleýmettik ınvestory Nazym Osaka erekshe bıznestegi joly jaıly baıandaıdy.
Sińilimniń dıagnozy sebep boldy
Meniń atym – Nazym, jasym 48-de. Úsh balanyń anasymyn. 25 jyl Japonıada ómir súrdim. 6 jyldan beri Almatyda turamyn. Aıman degen 33 jastaǵy sińlimniń Daýn sındromy bar bar, ol óte belsendi qyz, janýarlardy qatty jaqsy kóredi, janýarlar da oǵan úıirsek.
Bala kúnimde sińlimdi ertip qydyryp júrgenimde adamdardyń oǵan tańyrqaı qarap qalatynyn baıqaıtynmyn. Stýdent kezimde de oınatyp júrgende keıbir áıelder sińlimdi aýladan alyp ketýimdi talap etetin. Olardyń «onyń psıhıkalyq aýytqýy bar, balalarymyzǵa zıan keltirýi múmkin» dep qorqatynyna qatty qynjylatynmyn. Sińlim eseıgen saıyn bul jaǵdaı odan beter aýyrlaı tústi. Saýda ortalyqtarynda nemese kafede otyrǵanda eresekter de, jasóspirimder de oǵan ańtaryla qarap, uıaly telefonǵa sýretke túsirip, kúlip, saýsaǵyn shoshaıtatyn. Sińlim munyń bárin sezedi, betin jaýyp, tómen qarap, adamdarǵa qaramaýǵa tyrysatyn. Adamdardyń ózin kelemejdeıtini, bet-álpetine jıirkene qaraıtyny oǵan óte aýyr edi. Sińilimniń jasyp qalatyny maǵan odan da aýyr tıetin.
Men árdaıym ony qorǵaýǵa tyrysyp júremin. Bireýge eskertý jasaımyn, qajet jerde sýretke túsirgen telefondy qaǵyp tastaımyn, tipti keı jaǵdaılarda syndyrǵan kezderim de boldy. Biraq qoǵamdy ózgertý ońaı emes. Ýaqyt óte sińlim úıden shyǵýdan qashqaqtaıtyn boldy, óz kelbetinen uıala bastady, aqyrynda ózine senimsiz bolyp, minezi tuıyqtaldy. Negizi ol óte meıirimdi qyz. Jan-janýarǵa da, adamdarǵa da jany ashyp turatyn sezimtal.
Aıman aǵasy Saǵymmen birge.
Biz onyń árdaıym qasynan tabylýǵa tyrysamyz. Aǵam ekeýmiz de, anam da ony jalǵyz qaldyrmaıdy. Anam kúni-túni qasynda, biraq jasy 70-ke kelgen adam, keıde qatty sharshaıtyn kezderi bolady. Al sińlimniń energıasy taýsylmaıdy, ol únemi birdeńeni rettep, jınap, ornyn aýystyrady da júredi. Sondaı sátte meniń oıyma sińlime bir jumys ashyp berý ıdeıasy keldi, óıtkeni ony esh jerge jumysqa qabyldamaıdy. Daýn sındromy bar balalarǵa arnalǵan balabaqsha da, arnaıy mektep te joq.
Japonıada júrgende mysyqtarǵa arnalǵan qonaqúıde Daýn sındromy bar balalardyń jumys isteıtini týraly reportaj kórip qaldym. Sol kezde sińlim úshin Almatydan dál osyndaı qonaqúı ashý ıdeıasy keldi.
Heıttiń astynda qaldyq
Úısiz mysyqtar panalaıtyn qonaqúıimizdiń barlyq shyǵyny ózimizdiń moınymyzda. Keıde áleýmettik jelidegi oqyrmandar jem alýǵa donat tólep kómektesedi, olarǵa alǵysymyz sheksiz.
Bul jerdi ashqan kúnnen bastap heıttiń astynda qaldyq. Keıbir mıkroblogerler ózderine nazar aýdartatyn heıt úshin shyndyqqa janaspaıtyn aqparat taratyp, qonaqúıde «deni saý emes adam jumys isteıdi, oǵan janýarlardy senip tapsyrýǵa bolmaıdy» dep kórsetkisi keldi. 2GIS-ke de kópe-kórneý ótirik pikir jazǵandar boldy. Olardyń maqsaty ne ekenin bilmeımiz, múmkin básekelester shyǵar, álde múmkindigi shekteýli adamdardy jek kóre me eken, ókinishke qaraı, ondaılar da bar.
Bir kezde eki aı boıy birde-bir «qonaq» kelmeı, shyn máninde bos turǵan jaǵdaı boldy. Jalpy, mysyqtarǵa arnalǵan qonaqúı – maýsymdyq bıznes. Qonaqúı tolatyn kez – oqýshylardyń demalys ýaqyty: demalysta 100% qonaq bolsa, al jaı kúnderi 30–50%-ke deıin «kelýshi» bolyp turady. Sondyqtan keıde shynymen qınalyp qalamyz. Eń tabysty ýaqyt – jaz mezgili. Jazda qonaqúı toly bolady. Keıde mysyqtyń ıesi qaıtyp kelmeı, baılanysqa shyqpaı qoıatyn jaǵdaılar bolady. Mundaıda mysyq bizde qalady, árıne, ony dalaǵa tastaı almaımyz, asyrap alatyn otbasy tapqansha kútemiz.
Bizge dáretke shyǵýdy úıretý qajet mysyqtardy da alyp keledi. Keıde ıesi aýrýhanaǵa jatyp qalatyn nemese bosanǵannan keıin 40 kún úıden shyǵa almaıtyn kezde de birneshe aıǵa qaldyratyndar bolady. Asyraǵan mysyǵynan balasynda aýyr alergıa paıda bolyp, bizge ýaqytsha ákeletinder de bar. Olarǵa aı saıynǵy aqysyn tólep turady, jańa asyrap alýshy tabylǵansha biz qarap beremiz. Mysyqtardan bólek totyqus, balyq, kesirtke, tyshqan, maımyl, tasbaqa, qoıan, shınshılalardy da qabyldaımyz.
Mysyqtarǵa japon standartymen jaǵdaı jasaımyz
NEKOTYAN qonaqúıi
Mysyqtar qonaqúıi degen durys uıymdastyra alsań, jaqsy tabys ákeletin sharýa. Mańyzdy talap – tazalyqty qatań saqtaý, janýarlar kútimin ýaqytyly jasaý. Jumystyń eń qıyny – qyzmetkerlerdiń ár úıshik, tor, oıynshyq, ydys pen bólmeni árbir janýardyń artynan muqıat dezınfeksıalap otyrǵanyn baqylaý. Aseptıka men dezınfeksıa erejelerin qatań saqtaý asa mańyzdy. Sondaı-aq kez kelgen janýardy qabyldaǵanda onyń densaýlyǵyn muqıat tekserip alý qajet. Aýyryp turǵan janýardy múlde qabyldamaımyz, óıtkeni bul basqa «qonaqtarǵa» qaýip týdyrady. Sol sebepti densaýlyǵy sál kúmán týdyrǵan janýardy qabyldaýdan birden bas tartý kerek.
Bizdiń qonaqúıdegi árbir úıshik uzyndyǵy men eni bir metrlik kvadrat pishindi jáne jeke jeldetkish, sorǵysh júıesimen, jaryqpen jáne 24/7 jumys isteıtin túngi kórinisi bar beınebaqylaýmen jabdyqtalǵan. Úıshikterdiń aýasy árdaıym taza ári jańaryp turady, ishi jyly, jel soqpaıdy. Ár úıshik qonaq bólme, ájethana jáne uıyqtaıtyn bólme sıaqty úsh bólikke bólingen. Qonaqúıdiń ishinde Japonıanyń FUNAI markaly sorǵysh jeldetý júıesi jáne SHARP aýa tazartqyshy men ıonızatory bar. Mysyqtarǵa arnalǵan jalbyz ıisti aýa ylǵaldandyrǵyshtar jumys isteıdi.
Qonaqúıde úsh túrli nómir úlgisi bar: standart, premıým jáne VIP deluxe.
Standart – 90 sm × 1 m
Premıým – 1 m × 1 m
VIP deluxe – 4 sharshy metr bólme.
Barlyq nómirler jeldetkishpen jáne beınebaqylaýmen jabdyqtalǵan. Qonaqúıdiń táýliktik baǵasy – 2500-3000 teńge aralyǵynda.
Qonaqúıge bıznes retinde qyzyǵýshylyq joǵary. Bul bıznestiń yńǵaıly tusy – muny úıińnen de asha berýge bolady. Eń bastysy – janýarlardy jaqsy kóre alý. Sonda ǵana jumys óz jolymen júre bastaıdy, al mysyqty jaqsy kórmeıtin adam mundaıǵa ózi de jolamaıdy ǵoı.
«Kototerapıa» degen ne?
Bizdiń qonaqúıde «kototerapıa» da bar. Iaǵnı qoǵammen qarym-qatynasy qıyn balalar kelip, mysyqtarǵa kitap oqyp bere alady, olarmen oınaıdy, janýarlardyń janynda otyrýyna da bolady. Úıinde mysyq ustaýǵa jaǵdaıy kelmeıtin, biraq mysyqtardy jaqsy kóretin eresekter de bar, olar da bizge kelip, mysyqtardy baýyryna basyp, sıpap, oınap, tamaqtandyryp ketedi. Bul terapıa – tegin. Kez kelgen adam mysyqtarǵa táttiler ákelip, óz qolymen berýine bolady, mundaı kelýshilerdi qýana qarsy alamyz.
Aıman sińilim de qonaqúıde bar yntasymen jumys isteıdi: tańnan keshke deıin jınastyrady, tamaqtandyrady, oınatady, mysyqtarǵa qamqorlyq jasaıdy. Eń qyzyǵy –mysyqtar da ony erekshe jaqsy kóredi. Olar sińilim eshqashan tyrnaǵan emes, oǵan qarap aıbat shekpeıdi. Kerisinshe, oǵan ózderi jaqyndaıdy, ústin sıpasa da qarsylaspaıdy, tipti tizesine jatyp uıyqtap qalady. Sińilimniń mysyqtarǵa degen mahabbaty sheksiz, olardy jaqsy kórgeni úshin baqytty. Aımannyń rızalyǵyn kórip, biz odan da baqyttymyz. Qonaqúıde sińilimnen bólek kásibı mysyq kútýshiler de jumys isteıdi, negizgi tazalaý, kútim jáne dezınfeksıa jumystary sol mamandardyń moınynda. Sonymen qatar mysyqtardy qabyldap alatyn, medısınalyq bilimi bar admınıstratorymyz da bar. Japon standartymen jasalǵan qonaqúıimizge «qonaq» qabyldaýǵa daıynbyz!