Elimizdiń birqatar óńirinde el turǵyndarynan atys qarýyn, oq-dáriler men jarylǵysh zattardy satyp alý aksıasy aıaqtaldy.
Bul týraly İshki ister mınıstrliginiń ókili Shuǵyla Turlybek aıtty, dep habarlaıdy Almaty-akshamy.kz QazAqparatqa silteme jasap.
«Qoǵamdyq qaýipsizdikti qamtamasyz etý jáne atys qarýyn qoldana otyryp jasalatyn qylmystardyń aldyn alý maqsatynda İİM jyl saıyn halyqtan zańsyz saqtalǵan atys qarýyn, oq-dáriler men jarylǵysh zattardy satyp alý boıynsha aksıalar ótkizedi. Bıyl atalǵan aksıa 25 sáýirde bastaldy, bul maqsatqa respýblıkalyq búdjetten 88,7 mln teńge bólindi», - dedi İİM ókili vedomstvonyń baspasóz qyzmeti alańynda ótken brıfıńte.
Onyń dereginshe, is-shara qorytyndysyna sáıkes, ishki ister organdaryna 1 myńnan astam azamat júgindi. Olar 1,3 myń atys qarýyn, 9 myńnan astam oıyq qarý patrondaryn óz erkimen tapsyrdy.
«Bólingen qarajattyń ıgerilýine baılanysty aksıa Nur-Sultan, Almaty, Shymkent qalalarynda, Aqmola, Almaty, Atyraý, Jetisý, Batys Qazaqstan, Qaraǵandy, Qostanaı, Túrkistan, Soltústik Qazaqstan, Pavlodar, Ulytaý oblystarynda aıaqtaldy. İİM halyqtan qarý-jaraq zattaryn satyp alý boıynsha is-sharalardy 2008 jyldan beri ótkizip kele jatqanyn atap ótý qajet. Osy kezeńde azamattar óz erkimen jalpy 54 myńnan astam atys qarýyn, 2 mln-nan astam oıyq qarý patrondaryn tapsyrǵan», - dedi Shuǵyla Turlybek.