Almatydaǵy Memlekettik ortalyq mýzeıde osyndaı ataýmen kórme ashyldy.
Qazaqtyń dástúrli mádenıetin aıshyqtaıtyn kórme TÚRKSOI uıymynyń 30 jyldyǵyna arnaldy, dep habarlaıdy Almaty-akshamy.kz.
24.kz aqparaty boıynsha, halyqaralyq uıym tamyrlas túrki halyqtarynyń tarıhı jáne rýhanı turǵyda birigýine kúsh salyp keledi. «Bul kórme tarıhı-mádenı murany nasıhattaý, mádenı gýmanıtarlyq baılanystardy damytý jáne túrki mádenıetin halyqaralyq deńgeıde ilgeriletýdi maqsat etip otyr», - deıdi uıymdastyrýshylar. Kórmege Botaı mádenıetine tán at ábzelderi, turmystyq zattar, sándik-qoldanbaly óner jáne zergerlik buıymdar, kilem jáne kıizden jasalǵan zattar men dástúrli kıim úlgileri qoıyldy. Biregeı jádigerlerdiń barlyǵy Memlekettik ortalyq mýzeıdiń qorynan alyndy.
«Uly Dalanyń 7 qyry dep aıtamyz ǵoı, sol uly dalanyń jeti qyryn ashatyn zattar tur. Sonyń ishinde Botaıdan bastadyq. Óıtkeni sol Botaı halqynyń ata-babasy osy qazaq jerinde jylqy qolǵa ustaǵany dáleldengen bolatyn. Sony dáleldeıtin zattar tur. Jáne de rosomaha degen ıt tárizdi janýardyń qańqasy jatyr. Ol sol zamanda ata-babalarymyzdyń ıt tárizdi janýardy da qolǵa ustap bilgenin, úıge qolǵa ustaýǵa bilgenin kórsetedi», - deıdi QR Memlekettik ortalyq mýzeıi dırektorynyń orynbasary Ǵalıa Temirton.