1 naýryz – Alǵys aıtý kúnine oraı «Qazaqstan» teleradıokorporasıasynyń Qazaq radıosy dástúrli «Myń alǵys» sharasyn ótkizdi.
Merekelik sharaǵa QR Mádenıet jáne aqparat vıse-mınıstri Danıar Qadyrov, Senat depýtatattary B.Jeksenbaı, G.Shıpovskıh, A.Satvaldıev, A.Qapbarova, Májilis depýtattary N.Dementeva, Q.Ábden, Q.Isa jáne memlekettik organ jetekshileri men zıaly qaýym ókilderi qatysty, dep habarlaıdy almaty-akshamy.kz.
«Myń alǵys» jobasy bıyl jetinshi ret uıymdastyrylyp otyr. Osy ýaqyt ishinde joba aıasynda 25 otbasy baspanaly bolyp, túrli dertke shaldyqqan, kópshilik qoldaýyna muqtaj 350-ge jýyq adamǵa kómek berildi.
Bıylǵy sharanyń basty keıipkerleriniń biri – Qazaqstanǵa týǵan anasyn izdep kelgen Jánibek Savelev. Ótken jyldyń jeltoqsanynda elge kelip, Qazaq radıosynyń «Barmysyń, baýyrym?» habary arqyly anasyn izdegen Jánibekke qatysty júrgizilgen zertteý jumystary nátıjesinde 2001-2002 jyldary Arqalyqta dúnıege kelgen 4 balanyń týǵan anasy tabyldy. Al Jánibektiń óz anasyna qatysty izdeý jumystary áli de jalǵasýda. Sharada Jánibek týǵan halqyna alǵysyn jetkizdi.
«Týǵan anamdy izdeý osynshalyqty qıyn bolady dep oılaǵan joqpyn. Men Qazaqstanǵa kelgen kezde birden anamdy taýyp alyp, onymen kezdesemin dep josparladym. Anamdy izdeýim arqyly menen bólek 4 balanyń týǵan analary tabylǵanyna óte qýanyshtymyn. Bul men úshin motıvasıa, anamdy izdeýdi toqtatpaımyn. Qazaq jurtyna, týǵan halqyma menimen birge bolǵandary úshin úlken raqmetimdi aıtamyn!», - dedi Jánibek Savelev.
Sharada 1930 jyldary ata-babasy Qazaqstanǵa qonys aýdarǵan túrik etnosynyń ókili, Eńbek ardageri Iasha Koshalıoǵly 52 jyldan keıin dosymen kezdesti. Iasha Koshalıoǵlynyń ásker kezindegi dosy Sultan Ahmadov Reseıdiń Groznyı qalasynan arnaıy keldi. Iasha Koshalıoǵly Qazaq radıosynyń «Barmysyń, baýyrym» baǵdarlamasy arqyly óziniń jaqynyn tapqan 150-ge jýyq adamnyń qataryna qosyldy.
Sharanyń negizgi keıipkerleriniń biri – ómirden ótken bir adamnyń donorlyq organymen ómir súrip júrgen almatylyq Svetlana Kaıpova men Danıar Baıbýlaev. Astanadaǵy Ulttyq ǵylymı Onkologıa ortalyǵynyń transplantolog-dárigeri Mels Asyqbaev qazir elimizde 4 myńǵa jýyq naýqas donor kezeginde turǵanyn aıtady. Olardyń 90 paıyzdan astamy búırekke muqtaj.
«Bul kórsetkish tómendeýi úshin máıittik transplantasıaǵa degen kózqaras oń bolýy tıis. Mı ólimi tirkelgennen soń marqumnyń donor bolýǵa qolhaty bolǵan jaǵdaıda týystarynyń ruqsatymen aǵzasy ózge adamǵa salynady», - deıdi transplantolog.
Sonymen qosa sharaǵa «Myń alǵys» jobasy arqasynda shetelde 4 ret emdelip, tolyq remısıaǵa shyqqan 9 jastaǵy Alarnaz ben anasy Gúlaıym Abrahmanova, 25 balany asyrap alǵan aqtóbelik Jetesovter otbasy, Astanada órtenip jatqan kópqabatty úıden bir adamdy aman alyp shyqqan Ǵalymbek Óteshev qatysty.
Dástúrli jobanyń maqsaty – muqtaj jandarǵa kópshiliktiń atsalysýymen kómek kórsetip, qaıyrymdylyq pen izgilikti nasıhattaý, qaıyrymdy jandarǵa alǵys aıtý.