Almaty ákimi Erbolat Dosaev Medeý aýdanynyń turǵyndarymen kezdesti.
Aýdan turǵyndarymen ótken kezdesýde sýmen jabdyqtaý máselesi kóterildi, dep habarlaıdy Almaty-akshamy.kz
Qazirgi ýaqytta Muztaý, Kólsaı, Sulýsaı jáne Keńsaı shaǵynaýdandarynda ortalyq sý júıesi men sý kózi joq.
"2021 jyly «Muztaý» jáne «Kólsaı» shaǵyn aýdandarynda 32 km. sýmen jabdyqtaý jáne sý burýdyń taratýshy jelileri salyndy.
Qazir osy shaǵynaýdandardy sý kózimen qamtamasyz etý úshin «Balqash» sý jınaý stansıasyna deıin jalǵaýshy magıstraldyq jeli jobasy ázirlenip jatyr. Jobalaý qujattary osy jyldyń tamyz aıynda daıyn bolady", - dedi qala ákimi Erbolat Dosaev.
Qurylys-montajdaý jumystary kelesi jyldyń kóktemgi kezeńinde (2023 jylǵy sáýir) bastalady.
«Sulýsaı» shaǵynaýdany boıynsha «Almaty Sý» osy jyldyń tamyz aıynda magıstraldyq sý qubyry jáne kanalızasıa jelilerin salý jobasyn aıaqtaıdy. Skvajınalar qazylady.
Jobany iske asyrý 2023 jylǵa josparlanǵan. «Sulýsaı» shaǵynaýdanynyń ońtústik bóliginde skvajınalar qazylady (eń joǵary núktesi).
«Keńsaı» shaǵynaýdanyndaǵy M.Shoqaı jáne Sársenbaev kóshelerine sýmen jadbyqtaý men sý burýdyń magıstraldyq jelilerin salý jobasy ázirlendi. Qurylysy 2023 jylǵa josparlanǵan.
"Alaıda, baý-baqsha seriktestikterinde kóshelerdiń tar bolýynan jeti metrlik ınjenerlik dáliz júrgizilmegen. Sondyqtan taratý jelilerin salýǵa múmkindik joq. Jobany iske asyrý turǵyndardyń ózderine baılanysty. Sizder qajetti dálizdi usynatyn bolsańyzdar, biz birden sýmen jabdyqtaý jáne kanalızasıa jelilerin sala alamyz", - dedi shahar basshysy.