Á.Qasteev atyndaǵy QR Memlekettik óner mýzeıinde de mereke. Halyqaralyq «Mýzeı túni» is-sharasy aıasynda ónersúıer qaýymnyń nazaryna mýzeı qorynan alynǵan jádigerler negizinde «Japon óneri. XVII-XXI ǵasyrlar» atty kórme ashyldy jáne katalogtyń tusaýkeseri ótti.
“Qazaqstannyń jetekshi óner mýzeıiniń qorynan japon óneriniń katalogyn basyp shyǵarý eki el arasyndaǵy halyqaralyq mádenı ózara is-qımyldy nyǵaıtý men jandandyrýǵa septigin tıgizedi degen úmittemiz”, - dedi mýzeı dırektory Gúlaıym Jumabekova.
Atalmysh katalogqa 250 shyǵarma kirdi, olardyń kópshiligi 1936 jyldan bastap mýzeı qoryna Memlekettik Shyǵys óneri mýzeıinen, Qazaqstan Memlekettik Ortalyq mýzeıinen, Selınograd oblystyq tarıhı-ólketaný mýzeıinen jáne t.b. berildi. Mýzeıdiń ǵylymı qyzmetkerleri osy koleksıany zerttep, «Japon óneri. XVII-XXI ǵasyrlar» atty katalogty daıyndap, 150 jyldyq tarıhy bar, keńse jáne kásibı sıfrlyq shyǵarý salasyndaǵy álemdik kóshbasshy KONICA MINOLTA KAZAKHSTAN kompanıasynyń qoldaýymen jaryqqa shyǵardy.
Sondaı-aq, áıgili zamanaýı japon sýretshisi Kaorý Morı jasaǵan, qyzyqty álemge enýge múmkindik beretin «Qalyńdyqtyń hıkaıasy» serıasynyń manga kórmesi ashyldy.
Kórme ekspozısıasynda jete oryndalǵan ılústrasıalardyń 207 paraǵynan turatyn osy serıanyń 14-tomy usynylǵan. Olar Ortalyq Azıanyń jarqyn jáne erekshe mádenıeti men ómir saltyn kórsetetin áserli, ári shıelenisken oqıǵalardy, áserli keıipkerlerdi sıpattaıdy.
Merekelik is-shara seriktesi «Ichıkava» japon ortalyǵy jáne ál-Farabı atyndaǵy QazUÝ-niń Shyǵystaný kafedrasynyń uıymdastyrýymen «XVII-XXI ǵǵ. japon óneri» ekspozısıa zalynda orıgamı, kallıgrafıa, japon tilin úırený, temarı (jipten shar jasaý óneri) boıynsha sheberlik sabaqtary tegin ótýde.