Qazaqstan – senimdi munaı men gaz jetkizýshi el.
Qytaı – Eýropa dálizi boıynsha qurlyqtaǵy tranzıttik tasymaldyń 80 paıyzdan astamy Qazaqstan arqyly ótedi, dep habarlaıdy Almaty-akshamy.kz
Memleket basshysy Qasym-Jomart Toqaev Aq Orda rezıdensıasynda Qazaqstanda tirkelgen sheteldik dıplomatıalyq mısıa basshylarymen kezdesti.
QR Prezıdenti óz sózinde bizdiń eldiń ekonomıkalyq áleýetine, álemde tapshy munaı salasyndaǵy basymdylyǵyn atap ótti.
«Munaı qorynyń kólemi boıynsha Eýrazıada ekinshi oryn ıelenetini rastalǵan Qazaqstan – jahandyq energetıkalyq daǵdarys saldaryn jeńildetý úshin senimdi munaı men gaz jetkizýshi el», - dedi Toqaev.
Dúnıejúzilik banktiń málimeti boıynsha, kólik-tranzıt áleýetiniń damýy Ortalyq Azıa elderiniń tutas JİÓ-n 15 paıyzǵa ósýine yqpal etýi múmkin ekenin eskersek, Memleket basshysy «búginde Qytaı – Eýropa dálizi boıynsha qurlyqtaǵy tranzıttik tasymaldyń 80 paıyzdan astamy Qazaqstan arqyly ótetinin» atap ótti.
«Orta dáliz» dep atalatyn Transkaspıı halyqaralyq kólik baǵytynyń energetıka men azyq-túlik qaýipsizdigin qamtamasyz etý isindegi mańyzy artyp keledi», - dedi Prezıdent.
Sonymen qatar, el basshysy elimiz sıfrlyq transformasıany qoldaý úshin reformalar júrgizýge kiriskenin habarlady. Bul jumystardy búkil álem moıyndap otyr.
«BUU-nyń reıtıńisinde Qazaqstan «elektrondy úkimetti» damytý boıynsha álemniń úzdik otyzdyǵyna kiredi, sondaı-aq onlaın qyzmet kórsetý ındeksi boıynsha 11-orynda», - dedi memleket basshysy.
Qazaqstan aldaǵy 7 jylda 150 mıllıard dollar tikeleı shetel ınvestısıasyn tartýdy josparlap otyr.
«Qazaqstannyń ustanymy óte qarapaıym jáne aıqyn – biz nóldik somasy bar oıyndarǵa senbeımiz. Biz «Úlken oıyndarǵa» emes, Eýrazıanyń júregindegi barlyq adamdar úshin «Mol paıdaǵa» umtylamyz», - dep sózin túıindedi Toqaev.