Qyzmet medısına uıymdary arasyndaǵy qosymsha kelisimshart negizinde kórsetiledi.
Almaty qalalyq densaýlyq saqtaý basqarmasy ókilderi ambýlatorıa deńgeıinde salalyq mamandardan konsýltasıa alý jaıly túsindirip berdi, dep habarlaıdy Almaty-akshamy.kz
Basqarma jetekshisiniń orynbasary m.a. Nazgúl Imanǵalıevanyń aıtýynsha, salalyq mamannyń qabyldaýyna emhanadaǵy jalpy praktıka dárigeri arqyly jazylýǵa bolady. Sodan keıin pasıenttiń densaýlyq jaǵdaıyna qaraı profıldik mamanǵa joldama beriledi. Bul naýqastyń ǵana emes, mamannyń da ýaqytyn únemdeýge múmkindik beredi.
«Salalyq mamandardyń konsýltasıasy, KT/MRT, rentgen syndy taǵy da basqa dıagnostıkalyq qyzmetter saqtandyrylǵan azamattarǵa mindetti medısınalyq saqtandyrý arqyly kórsetiledi. Ol úshin emdeýshi dárigerdiń joldamasy qajet. Dáriger joldamany tıisti kórsetilimder men aýrý belgilerine qaraı jazyp beredi», - deıdi maman.
Taǵy bir eskerte keterligi, qajetti qyzmet túri emhanada kórsetilmeıtin bolsa pasıentke basqa emdeý mekemesine joldama berilýi tıis. Qyzmet medısına uıymdary arasyndaǵy qosymsha kelisimshart negizinde kórsetiledi.
Sonymen qatar, ýchaskelik dárigerdiń joldamasyn qajet etpeıtin jaǵdaılar da bolady. Mysaly, salalyq maman qoıǵan dıagnozdy naqtylaý maqsatynda qosymsha ınstrýmentaldyq tekserý júrgizý qajet bolǵanda, shuǵyl stomatologıalyq kómek qajet bolsa, tirkelgen emhanadaǵy akýsherdiń nemese pısqolog mamannyń qabyldaýyna kirýge, dermatovenorologıalyq syrqattardy emdeý úshin joldama alýdyń qajeti joq. Mundaı jaǵdaılarda atalǵan qyzmetterdi kórsetetin klınıkanyń tirkeý bólimi arqyly jazylsa jetkilikti.
«Al, shuǵyl jaǵdaılarda medısınalyq kómek keshiktirmeı kórsetilýi tıis. Eger emhana qyzmet kórsetýden orynsyz bas tartqan jaǵdaıda klınıka janyndaǵy pasıentterdi qoldaý qyzmetine habarlasyp, máseleni sol jerde sheshýge bolady», - dedi Nazgúl Imanǵalıeva.