Elimizde múgedek balalary bar ata-analarǵa aqysy tólenetin qosymsha eńbek demalysyn berýdi kózdeıtin zańnamalyq túzetýler qarastyrylyp jatyr.
Bul jaıynda QR Premer-Mınıstriniń orynbasary Eraly Toǵjanovtyń Májilis depýtattary saýalyna bergen jaýabynda aıtylǵan, dep habarlaıdy Almaty-akshamy.kz QazAqparatqa silteme jasap.
«Eńbek kodeksiniń 89-babyna sáıkes, jumysshylarmen eńbek, ujymdyq kelisimshartpen qosymsha aqysy tólenetin jyl saıynǵy eńbek demalysy belgilenýi múmkin. Osylaısha, múgedek bala tárbıelep otyrǵan jumysshyǵa aqysy tólenetin qosymsha eńbek demalysyn berý máselesin taraptar eńbek, ujymdyq kelisimshart aıasynda sheshe alady», - dedi Úkimet basshysynyń orynbasary jaýabynda.
Onyń atap ótýinshe, bul másele óte ózekti. Sondyqtan ol jumys berýshilermen jáne «Atameken» UKP-men birge zańnamany jetildirý, Áleýmettik kodeks ázirleý aıasynda qaralatyn bolady.
«Buǵan qosa, búginde Úkimet, jumysshylardyń respýblıkalyq birlestigi jáne jumys berýshiler arasyndaǵy bas kelisim júzege asyrylyp jatyr. Onda kelisim jáne ujymdyq kelisimshart aıasynda áıelderdiń, jastar men múgedekterdiń negizgi quqyqtary men kepilderin júzege asyrýǵa jumys berýshiniń jaǵdaı jasaý kózdelgen»,- dedi Eraly Toǵjanov.