2024 jyly Medısınalyq saqtandyrý qory Almatyda onkologıalyq dertterdi erte anyqtaý sharalaryna 4 mlrd teńgege jýyq qarjy bóldi. Arnaıy skrınıngtik tekserýler obyrdyń úsh túrin erte anyqtaýǵa múmkindik beredi.
Skrınıngtik zertteýlerden qalaı ótýge bolady jáne bul tekserýlerdiń mańyzy qandaı? Bul týraly MSQ Almaty fılıaly ókilderi áńgimelep berdi.
Habarlamaǵa súıensek, bıyl 228 myńǵa jýyq almatylyq turǵyn onkologıalyq tekserýlerden ótýi tıis.
Skrınıng arqyly qandaı syrqattardy anyqtaýǵa bolady?
• Jatyr moıny obyryn erte anyqtaý – 30-70 jas aralyǵyndaǵy áıelder
• Sút bezi obyryn erte anyqtaý – 40-70 jas aralyǵyndaǵy áıelder
• Kolorektaldy obyrdy erte anyqtaý – 50-70 jas aralyǵyndaǵy erler men áıelder
Skrınıngten ótý jıiligi qandaı?
Skrınıngtik zertteýlerdiń keı túri bes jyl saıyn, keıbiri – eki nemese tórt jyl saıyn jasalady. Mysaly, sút bezi isigi men kolorektaldy obyrǵa 2 jylda 1 ret, al jatyr moıny obyryna – 4 jylda 1 ret tekserilý qajet.
Skrınıngtik baǵdarlamaǵa qandaı qyzmetter kiredi?
Áıelder jatyr moıny obyryna tirkelgen emhana arqyly tekseriledi. Akýsher-gınekolog, onkolog pen mammolog syndy mamandar keńesine júginip, ÝDZ, mammografıa syndy tekserýlerden óte alady. Sonymen qatar, sút bezi obyrynyń aldyn alý úshin vıdeokolposkopıa nemese kolposkopıa, PAP-test, pýnksıalyq bıopsıa men gıstologıalyq zertteýlerge tapsyrýǵa bolady.
Kolorektaldy obyrdyń aldyn alýǵa arnalǵan tekserýlerden erler de, áıelder de ótýi tıis. Profılaktıkalyq is-sharalar barysynda olar hırýrg, onkolog, gastroenterolog pen proktolog mamandardan keńes alady. Sondaı-aq, úlken dárettegi jasyryn qandy tekserý maqsatynda shuǵyl ádispen gemokýlt-test tapsyrady, jalpy vıdeokolonoskopıý, endoskopıalyq bıopsıa jáne gıstologıalyq tekserýlerden ótýge bolady. Profılaktıkalyq tekserler MÁMS paketine engen, sondyqtan skrınıngten ótetin azamat saqtandyrylǵan bolýy shart.
Skrınıng ótkennen keıin ne isteımiz?
Skrınıngtik zertteýden ótken pasıentter densaýlyǵynan aqaý tabylǵan jaǵdaıda salalyq mamandardyń konsýltasıasyna jiberiledi, qajet bolǵanda em taǵaıyndalady.