Túrkıanyń Antalá qalasynda WKF karateden Karate1 Premier League - Antalya 2024 týrnıri ótip jatyr.
Sportty damytý dıreksıasynan málim etkenindeı, jarystyń alǵashqy kúni 50 keli salmaqta Azıa oıyndary men birinshiliginiń kúmis júldegeri, 2023 jylǵy álem chempıony Móldir Jańbyrbaı bes qarsylasyn utyp, altynǵa talasýǵa múmkindik aldy, dep habarlaıdy almaty-akshamy.kz.
Jarys jolynda qazaqstandyq sportshy ıtalıalyq Azıa Agýsty 6:2, Sılıa Ýıkendi (Aljır) 6:4, portýgalıalyq Katarına Rodrıgesti 3:1 esebimen utty.
Endi fınalda Venesýela ókili Salazar Iorgelıspen altyn úshin talasady.
Móldirdiń jeke bapkeri – Nurjan Aqpanbet.
Sonymen qatar taǵy úsh qazaqstandyq sportshy qola medal úshin talasady. Atap aıtqanda, 75 kelide el namysyn qorǵaıtyn Ábilmansur Batyrǵalı shırek fınalda Petar Zaborskıdan (Soltústik Makedonıa) basym túskenimen, jartylaı fınalda mysyrlyq Abdalla Abdelazızge ese jiberdi. Dál osy salmaqta óner kórsetetin Nurqanat Ájiqanov shırek fınalda túrkıalyq Iýrýr Omer Farýkten utyldy. Endi ol mysyrlyq Abdelgavad Abdalla Heshammen qola medaldi sarapqa salady.
Al qyzdar arasynda 61 kelidegi 2023 jylǵy Azıa oıyndarynyń qola júldegeri, Azıa chempıony Ásel Qanaı shırek fınalda Marokko ókili Fatıma-Zahra Chadjaıǵa jol berdi. Kelesi qarsylasy – fransıalyq Lea Avazerı.
Atalmysh dodada jeńimpazdar men júldegerler 17 naýryz kúni anyqtalady.