23 naýryzda Almatydaǵy perzenthanalardyń birinde 34 aptada sırek kezdesetin týa bitken patologıamen ul bala dúnıege keldi. Sábıdiń moınynyń oń jaq jartysynda úlken kıstozdy lımfangıomasy bolǵan. Onymen qosa tynys alý jáne júrek-qan tamyrlary jetkiliksizdigi de isiktiń asqynýyna sebep bolǵan.
Náresteniń salmaǵy 3844 g, boıy 46 sm bolyp týyldy. Balany emhananyń neonatologıalyq brıgadasy kesar tiliginen keıin birden jasandy tynys alý apparatyna qosyp, Almaty qalasynyń Balalarǵa jedel medısınalyq kómek kórsetý ortalyǵyna jetkizdi.
Bala óte aýyr jaǵdaıda kelip tústi. Ómir súrý kórsetkishteri baqylaýǵa alynyp, shuǵyl kómekti talap etti. Últradybystyq zertteý derekteri boıynsha, qursaqishilik kezeńde ólshemi 12 sm-ge jýyq túzilis bar degen dıagnoz qoıylǵan. Ol degenimiz bosaný kezindegi erekshe akýsherlik jáne hırýrgıalyq tásildi qajet etedi degen sóz.
24 naýryzda balalar jedel járdem bóliminiń dárigerleri isik tárizdi túziliske pýnksıa jasap, 500 ml-den astam suıyqtyqty alyp tastady. Bul tunshyǵý qaýpin azaıtýǵa kómektesti. Balanyń jaǵdaıyn bólim meńgerýshisi Ulyqpan Bolatbekuly Álseıitov baqylaýǵa aldy. Sábıdi Balalarǵa shuǵyl medısınalyq kómek kórsetý ortalyǵynyń jańa týǵan náresteler jansaqtaý bólimine jatqyzyp, ota jasaýǵa daıyndady.
26 naýryzda lımfangıomany túbegeıli alyp tastaý operasıasy jasaldy. Operasıany balalar hırýrgi Myrzahmet Samatbek Ábdilmanapuly men asıstent Kúnıazov Jalǵas Qaıyrbekuly endotrahealdi anestezıamen jasady. Neonatolog, hırýrg jáne anestezıologtardyń úılesimdi jumysynyń arqasynda ota sátti ótti.
Bala taǵy úsh apta boıy jansaqtaý bóliminde dárigerlerdiń baqylaýynda boldy. Keıin qanaǵattanarlyq jaǵdaıda úıge shyǵaryldy.
Almaty qalasynyń Balalarǵa jedel medısınalyq kómek kórsetý ortalyǵynyń ujymy úshin bul kúrdeli týa bitken patologıasy bar jańa týǵan náresteniń ómiri úshin kúrestegi kezekti jeńisi. Operasıadan keıin tigister jazylyp, ýaqyt óte kele múldem kórinbeıtin bolady. Al bala qurdastarymen birdeı ósip, damıdy.