Almatydaǵy Kardıologıa jáne ishki aýrýlar ǵylymı-zertteý ınstıtýtynda júrek-qan tamyrlary hırýrgıasy salasyndaǵy jetekshi sarapshy, Karolınsk ınstıtýtynyń (Stokgolm, Shvesıa) profesory Naýzad Salehtiń jetekshiligimen sheberlik klasy ótip, 7 pasıentke qolqa qaqpaqshasyn endovaskýlárlyq aýystyrý boıynsha kúrdeli operasıalar jasaldy.
Mundaı az ınvazıvti hırýrgıalyq aralasýlar ashyq operasıalar jasaýǵa bolmaıtyn aýyr júrek qan tamyrlary aýrýlary bar naýqastarǵa jasalady.
Naýqastardyń biri – 87 jastaǵy Mıhaıl Fedorovıch qolqa qaqpaqshasynyń aýyr stenozyna shaldyqqan. Ony júrek tusyndaǵy aýyrsyný, tynyshtyqta da paıda bolatyn júrek soǵysy, entigý, bas aýrýy mazalaǵan. Ol dıagnozyn bir jyl buryn entigý kúsheıgen kezde bilgen.
«Kardıologıa jáne ishki aýrýlar ǴZI Almatyda qolqa qaqpaqshasyn endovaskýlárlyq ımplantasıalaý boıynsha joǵary tehnologıaly operasıany damytýdyń basynda tur. TAVI - eń qymbat operasıalardyń biri, biraq pasıentter úshin tegin. Biz halyqqa joǵary bilikti kardıohırýrgıalyq kómek kórsetýdi jaqsartý boıynsha úzdiksiz jumys júrgizýdemiz. Klınıkanyń ıntervensıalyq kardıologtarynyń joǵary kásibı sheberligi eń kúrdeli operasıalardy jasaýǵa múmkindik beredi», – deıdi Basqarma tóraǵasy Marat Pashımov.
Instıtýttyń rentgenendovaskýlárlyq blog meńgerýshisi Alekseı Kolesnıkovtyń aıtýynsha, barlyq manıpýlásıalar qan tamyryna engizilgen kateter arqyly júzege asyrylady. Mıtraldy qaqpaqshaǵa operasıa jasaý júrek qaqpaqshasy men júrektiń jumysyn qalpyna keltirýge, entigý, sharshaý, júrek yrǵaǵynyń buzylýy, aıaqtyń isinýi sıaqty belgilerdi azaıtýǵa jáne naýqastardyń ómirin uzartýǵa kómektesedi. Mundaı operasıalar kóptegen adam ómirin saqtap qalady.
Profesor Saleh klınıkanyń ıntervensıalyq kardıologtarymen óz bilimi men tájirıbesimen bólisti, bul qolqa qaqpaqshasyn aýystyrýdy qajet etetin pasıentterge medısınalyq kómek kórsetý deńgeıin aıtarlyqtaı arttyrýǵa múmkindik beredi. Ol ınstıtýt mamandarynyń joǵary biliktiligin, barlyǵy óz isin jaqsy biledi dep atap ótti.