Estrada ánshisi Mıras Júginisov keıingi kúnderi qoǵamda úlken talqyǵa túsken aǵasy Rústem Júginisovtiń málimdemesine qatysty óz oıyn bildirip, jurtshylyqtan keshirim surady. Ol bul týraly Threads áleýmettik jelisindegi paraqshasynda jazdy, - dep habarlaıdy Aqshamnews.kz.
Buǵan deıin ne boldy?
Aqtóbedegi meshitte musylmansha kıingen er adam namaz oqýǵa barǵan qyzǵa ıntımdik qarym-qatynas úshin "bir rettik neke" usynǵan bolatyn. Oqıǵaǵa Mırastyń aǵasy Rústem Júginisov pikir bildirip, qyzdyń ózin kinálaǵan edi. Onyń pikiri jelide úlken rezonans týdyryp, jurt Júginisovter otbasyna heıt jaýdyrdy.
"Barsha jannan keshirim suraımyn!"
Aǵasynyń aıtqany úshin Mıras ta aıyptalyp, kópshilik onyń jaqynda bolatyn konsertine barmaıtyndaryn jarys jazdy. Jaǵdaıdy beı-jaı qaldyrmaı Mıras Júginisov Threads-tegi paraqshasynda jazba jarıalady. Onyń aıtýynsha, árbir adamnyń óz pikiri bar, alaıda bul tusta otbasy músheleriniń kózqarastary birdeı bola bermeıdi.
"Sońǵy ýaqytta aǵamnyń aıtqan sózderi qoǵamda úlken rezonans týdyryp, keıbir azamattardyń kóńiline qaıaý túsirdi. Ol – óz oıyn aıtqan jeke tulǵa. Al men óz jolymmen júrgen, jeke ustanymy bar adammyn. Otbasyma degen qurmetim zor, biraq týystarymnyń pikiri menimen árdaıym sáıkes kele bermeıdi. Osy sebepten keıde kelispeýshilikter týyndaıtyny da ras", – dep jazdy ánshi.
Sonymen qatar, Mıras Júginisov bul jaǵdaıdan keıin renjigen jandardan keshirim surady. Ol óziniń shyǵarmashylyǵynda áıel adamdarǵa degen qurmetti birinshi orynǵa qoıatynyn atap ótti.
Aıta keteıik, qyrkúıekte Almaty qalasyndaǵy Ortalyq stadıonda Mıras Júginisovtyń jeke konserti ótedi dep josparlanyp otyr.