30 shilde kúni Almaty — Beıjiń baǵytyndaǵy jańa tikeleı reıs ashyldy. Bul reısti Air China áýe kompanıasy júzege asyrady. Ashylý rásimine Qytaı Halyq Respýblıkasynyń Almatydaǵy Bas konsýly Szán Veı hanym, Almaty qalasy Týrızm basqarmasynyń basshysy Ǵalıa Toqseıitova, sondaı-aq, Almaty halyqaralyq áýejaıy men áýe kompanıa ókilderi qatysty, dep habarlaıdy Aqshamnews.kz.
Air China — Qytaıdyń memlekettik áýe kompanıasy jáne ulttyq áýe tasymaldaýshysy, bas keńsesi Beıjiń qalasynda ornalasqan. Kompanıa álemdik Star Alliance áýe alánsynyń múshesi jáne Qytaıdaǵy eń iri áýe tasymaldaýshylardyń biri.
Tikeleı reıstiń ashylýy eki el arasyndaǵy strategıalyq áriptestikti odan ári nyǵaıtýǵa, ózara týrısik jáne iskerlik saparlardyń artýyna, sondaı-aq, túrli salada tájirıbe men ınvestısıa almasýǵa yqpal etedi. 2025 jyldyń birinshi toqsanynda Almatyǵa Qytaıdan 20 952 týrıs kelgen, bul ótken jyldyń osy kezeńimen salystyrǵanda 39,9% kóp.
Qazirgi tańda Almaty Qytaıdyń Gýanchjoý, Sıan, Úrimji, Shanhaı, Hanchjoý jáne Saná qalalarymen tikeleı áýe reısteri arqyly baılanysqan. Jańa reıs qazirgi baǵyttardy tolyqtyryp, eki el arasyndaǵy reıster jıiligin arttyrady. Qazirgi ýaqytta aı saıynǵy reıster sany 150-den asady.