Vedomstvo 15 mlrd teńgeden asa somanyń jymqyrylǵanyn anyqtaǵan.
Mektep muǵalimi Astanada ótken pedagogter forýmynda Oqý-aǵartý mınıstri Ǵanı Beısembaevtyń aldynda mekteptegi jemqorlyq máselesin kóterdi, dep habarlaıdy aqshamnews.kz
Aıtýynsha, ol qazir ońtústik óńirden kelip, ózine Aqmola oblysynan jumys tapqan. Alaıda týǵan jerindegi inileri men sińlileri eki qolǵa bir kúrek tappaı otyrǵan kórinedi.
«Olar bir jerge jumysqa turý úshin, ótirik emes, kemi 1 nemese 2 mln teńgege deıin aqsha suraıdy. Ol – kádimgi jemqorlyq. Men tek pedagog mamandyǵynda demeımin, negizi ońtústikte jemqorlyq keń taraǵan. Biraq sonyń ishinde muǵalim mamandyǵy bizge kerek qoı? Qashan men sıaqty aqshasyz, ózi jumysqa tura alady?» – dep surady ol mınıstrden.
Sol suraqty keıin jýrnalıser Ǵanı Beısembaevqa qaıta qoıdy. Muǵalimniń aıtqan ýájine qatysty pikir bildirýin surady.
«Áriptesimizdiń qoıǵan suraǵy qaı mektepte, qaı aýdanda bolǵany naqty aıtylǵan joq. Oblysty birden qaralaýǵa bolmaıdy ǵoı. Bul suraqty sol sebepti kópshiliktiń aldynda qaýjaǵanym joq. Jalpy, ol aqparattyń sebebin anyqtaımyz. Aqparat naqty bolsa, tekserý qıyndyq týǵyzbaıdy dep oılaımyn», – dedi Oqý-aǵartý mınıstri.
Sondaı-aq ol vedomstvonyń Antıkormen birlesip, tyǵyz jumys atqaryp jatqanyn, sonyń arqasynda 15 mlrd teńgeden asa somanyń jymqyrylǵanyn anyqtaǵandaryn alǵa tartty.