5 maýsymnan 6 maýsymǵa qaraǵan túni Ortalyq jáne Soltústik Qazaqstan turǵyndary, onyń ishinde Astana, Qaraǵandy, Pavlodar jáne Qostanaı qalalarynyń halqy aspanda jarqyraǵan qubylysqa kýá boldy.
"Bul buryn orbıtada bolǵan ǵarysh nysandarynyń biriniń atmosferaǵa enýine qatysty bolýy múmkin", – dedi mınıstrlik.
Ǵaryshtyq qaldyqtardyń qozǵalysyn baqylaıtyn halyqaralyq uıymdardyń derekterine sáıkes, dál osy ýaqyt aralyǵynda úsh jaǵdaı tirkelgen, olardyń árqaısysy baıqalǵan qubylysty týdyrýy múmkin. Atap aıtqanda, Qytaıdyń ZQ-2E zymyranynyń údetkish blogy.
- Atmosferaǵa ený ýaqyty: 5 maýsym, Astana ýaqytymen shamamen 22:40.
- Nysan: LandSpace kompanıasy 17 mamyrda ushyrǵan Zhuque-2 Enhanced zymyranynyń satysy.
- Ereksheligi: Ekologıalyq taza otyn (suıyq metan men ottegi) paıdalanylady, janý kezinde aıqyn jaryq shyǵarady.
Bul nysan ýaqyt jaǵynan jáne kórinis sıpattamasy boıynsha Qazaqstan turǵyndarynyń baıqaǵan qubylysyna dálme-dál sáıkes keledi.
Mınıstrlik málimetinshe, ekinshi nysan – STARLINK-1631 (SpaceX) spýtnıgi. Atmosferaǵa ený ýaqyty: 6 maýsym, Almaty ýaqytymen 03:41. Eski spýtnıkterdiń biriniń josparly orbıtadan shyǵýy.
Al úshinshisi – japonıalyq H-2A R/B zymyranynyń údetkish blogy. Onyń atmosferaǵa ený ýaqyty: 6 maýsym, Almaty ýaqytymen 00:36. Nysan pasıvti orbıtadan shyǵý rejıminde bolǵan.
"Qazir Qazaqstan Respýblıkasy aýmaǵyna qandaı da bir fragmentterdiń qulaǵany nemese zalal keltirgeni týraly rastalǵan aqparat joq. Mundaı nysandar, ádette, atmosferada tolyq janyp ketedi (iri bólikterdiń Qazaqstan aýmaǵyna qulaýy ekitalaı), al qubylystyń ózi kórneki bolǵanymen, qaýipsiz úderis bolyp sanalady", - delingen habarlamada.
Mınıstrlik azamattardan sabyr saqtap, tek resmı aqparat kózderine senýge shaqyrdy.