Densaýlyq saqtaý mınıstri Ajar Ǵınıat medısına qyzmetkerleriniń kásibı jaýapkershiligin saqtandyrý tetigine túsinik berdi, dep habarlaıdy Almaty-akshamy.kz QazAqparat-qa silteme jasap.
Elimizde dárigerdiń kásibı jaýapkershiligine qatysty mindetti saqtandyrý júıesi engizilmek.
A. Ǵınıattyń aıtýynsha, mınıstrlik medısına qyzmetkerleriniń kásibı jaýapkershiligin saqtandyrýdyń túrli modelderine taldaý júrgizdi.
«Halyqaralyq tájirıbede medısına qyzmetkerlerin qorǵaý úshin tıisti qorlar men qaýymdastyqtar (Shvesıa, Kanada, Danıa) qurý, sondaı-aq jeke naryqtar (AQSH, Germanıa, Japonıa, Túrkıa) arqyly kásiptik jaýapkershilikti mindetti saqtandyrý júıesi qoldanylady. Halyqaralyq tájirıbege súıene otyryp, medısına qyzmetkerleriniń kásiptik jaýapkershiligin saqtandyrýdyń ońtaıly tetigi retinde Shvesıa, Kanada, AQSH, Japonıa jáne Túrkıa modelderi boıynsha beıimdelgen naryqtyq saqtandyrý modelin qoldanýdy usynyp otyrmyz», - dedi A. Ǵınıat Májiliste jańadan saılanǵan depýtattar aldynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde.
Sonymen qatar, ol 2017 jyly mınıstrlik Memleket basshysynyń tapsyrmasy boıynsha Derbes kepildik berý qoryn qurý aıasynda yntymaqtastyq qaǵıdaty boıynsha saqtandyrýdyń áleýmettik modelin usynǵanyn eske saldy (jarna mólsherin medısınalyq uıymǵa – 50%, medısına qyzmetkerine – 50% dep bólý). Alaıda, zań jobasy qoldaý tappaı, qabyldanbady.
«Halyqaralyq tájirıbeni taldaýdyń negizinde, sondaı-aq jurtshylyqtyń, memlekettik organdardyń jáne saqtandyrý kompanıalarynyń qatysýymen tıisti talqylaýlar boldy. Bul turǵyda jumys istep turǵan saqtandyrý kompanıalary arqyly medısına qyzmetkerleri kásiptik jaýapkershiliginiń júktelgen saqtandyrý modeli qabyldandy. Jumys berýshi – medısınalyq uıym saqtanýshy bolady. Bolashaqta medısına qyzmetkerlerin lısenzıalaýdy engizgennen keıin, medısına qyzmetkerleriniń kásiptik jaýapkershiligin saqtandyrý júıesine qatysýshylardyń jaýapkershiligin bólýge múmkindik beredi», - dedi mınıstr.
A. Ǵınıattyń sózine qaraǵanda, osy modelge sáıkes shaǵymdy qaraǵan kezde medısınalyq uıym medıasıa elementterin qoldanyp, sondaı-aq medısınalyq qaýymdastyqtardy tarta otyryp, ishki aýdıt qyzmetiniń deńgeıinde júzege asyrady. Bul kezeńde másele medısınalyq uıymnyń ózinde rettelýi múmkin. Tıisti komısıa naýqastyń densaýlyǵyna zıan keltirildi degen sheshim jasasa, osy oraıda pasıentke tólem jasaý úshin saqtandyrý kompanıasyna joldama beriledi.
«Eger pasıent komısıanyń sheshimimen kelispegen jaǵdaıda, shaǵym saraptamalyq qorytyndy berý úshin Medısınalyq jáne farmasevtıkalyq baqylaý komıtetine tapsyrylady. Oń nátıje shyǵarylǵan jaǵdaıda, shaǵym boıynsha materıaldar, onyń ishinde sot-medısınalyq saraptamanyń qorytyndysy medısınalyq uıym saqtandyrylǵan saqtandyrý kompanıasyna beriledi. Ol jerde pasıentke keltirilgen zıan úshin ótemaqy tóleýdi Densaýlyq saqtaý mınıstrligi aıqyndaǵan qaǵıdalar boıynsha saqtandyrý kompanıasy júrgizedi. Tólemnen bas tartqan jáne sheshimge qanaǵattanbaǵan jaǵdaıda, pasıent sotqa júginýge quqyly», - dedi A. Ǵınıat.
Zań qabyldanǵannan bastap saqtandyrýdy jumys berýshiniń esebinen júzege asyrý usynylyp otyr.
«Al, 2025 jyldan bastap saqtandyrý syılyqaqysynyń somasyn medısınalyq uıym men medısına qyzmetkerleriniń arasynda bólý usynyldy. Bul óz kezeginde ortaq kásiptik jaýapkershilikke ákeledi», - dedi mınıstr.
Onyń atap ótýinshe, kásiptik jaýapkershilikti saqtandyrý júıesimen 304 myńnan astam medısına qyzmetkerin qamtý usynyldy.