Mınıstr Kýbogynyń jalpy júlde qory 10 mıllıon teńge
2-24 mamyr aralyǵynda tuńǵysh ret Qazaqstan Respýblıkasy Mádenıet jáne sport mınıstriniń Kýbogi úshin keshendi jarys ótedi, dep habarlaıdy Almaty-akshamy.kz Qazaqstan Respýblıkasy Mádenıet jáne sport mınıstrliginiń saıtyna silteme jasap.
Elimizdiń sport salasyndaǵy 17 oqý ornynda tálim alyp jatqan 2006-2007 jyly dúnıege kelgen jasóspirimder halyq arasynda keń tanylǵan sport túrleri – boks, dzúdo, grek-rım jáne erkin kúresten kim myqtyny anyqtaıdy.
Komandalyq básekeniń maqsaty – daryndy balalardyń kózge túsýine jaǵdaı jasaý, sport mektep-ınternat-kolledjder arasyndaǵy básekelestikti arttyrý. Jarysqa tek 2021-2022 oqý jylyna deıin qabyldanǵan shákirtter qatysa alady.
Búgin elordada jerebe tartý rásimi bolyp, 17 komanda 4 topqa bólindi. Atalǵan komandalar Nur-Sultan, Almaty, Aqtóbe men Taraz qalasynda ózara kúsh synasady.
Ár toptaǵy komandalar aınalmaly júıe boıynsha bir-birimen kezdesedi. Qorytyndy nátıje tórt sport túri boıynsha jeńip alǵan medaldar sapasy boıynsha anyqtalady. Tek 1-oryn alǵan komandalar jartylaı fınalǵa shyǵady. Onda A tobynyń jeńimpazy S tobynyń úzdigine, V tobynyń myqtysy D tobynyń jeńimpazyna túsedi. Jartylaı fınal jáne fınal 22-24 mamyr aralyǵynda Nur-Sultan qalasyndaǵy J.Úshkempirov atyndaǵy jekpe-jek saraıynda ótedi.
«Aldaǵy ýaqytta «Mınıstr Kýbogi» sarapqa salynatyn sport túrleriniń sanyn kóbeıtýge tyrysamyz. Mundaǵy maqsat – sport mektep-ınternat-kolledjder arasyndaǵy básekelestikti arttyrý. Osy keshendi jarys bizge ár sport túrindegi bilikti bapkerlerdi anyqtaýǵa kómektesedi, dep senemiz. Sonymen qatar arnaýly oqý oryndaryndaǵy ózekti máselelerdi anyqtap, mindetin aıqyndaımyz, dep oılaımyn», - dep aıtty MSM Sport jáne dene shynyqtyrý isteri komıteti tóraǵasy Samat Erǵalıev jerebe tartý rásimi kezinde.
Mınıstr Kýbogynyń jalpy júlde qory 10 mıllıon teńge. 1-oryn alǵan komandaǵa - 5 mln, 2-orynǵa – 3 mln, 3 orynǵa – 2 mln. teńge beriledi.
Aıta keteıik, jarystyń bas tóreshisi: Bekbolat Baıjanov – QR MSM Sport jáne dene shynyqtyrý isteri komıteti tóraǵasynyń orynbasary;
Jarystyń bas hatshysy: Oralbaı Jaqsymbetov – Respýblıkalyq sportty damytý dıreksıasy dırektorynyń orynbasary.