Biryńǵaı tólem 2023 jyldan bastap engiziledi.
Ulttyq ekonomıka mınıstri Álibek Qýantyrov bıznes úshin biryńǵaı tólem engiziletinin aıtty, dep habarlaıdy Almaty-akshamy.kz
Onyń aıtýynsha, Memleket basshysy Qasym-Jomart Toqaev byltyrǵy joldaýynda mıkro jáne shaǵyn bıznes úshin eńbekaqy tóleý qorynan alynatyn biryńǵaı tólemdi engizýdi tapsyrǵan. Osylaısha, qazirgi barlyq tólem – zeınetaqy, tabys salyǵy jáne áleýmettik saqtandyrý jarnasy bir tólemmen jasalýy kerek. Nátıjesinde kásipkerler artyq jumys istemeıdi, jumysshylardyń aýdarymyn biryńǵaı tólemmen júrgizedi.
«Áleýmettik aýdarymdar mólsheri qyzmetkerlerge tólenetin bolashaq tólemge áser etetindikten, júktemeni jeke tabys salyǵy esebinen tómendetý kózdelip otyr. Biryńǵaı mólsherleme mindetti zeınetaqy jarnalaryn engizýdi jáne áleýmettik aýdarymdar mólsherlemesiniń ósýin eskeredi», - dedi Álibek Qýantyrov.
Biryńǵaı tólemdi mıkro jáne shaǵyn bıznes sýbektileri erikti negizde qoldanady. Tólem somasy biryńǵaı jıyntyq tólemge uqsas bolady.
«Nátıjesinde biryńǵaı tólem salyqtar men eńbekaqy tólemderin esepteýdi jeńildetip qana qoımaı, salyq júktemesin azaıtýǵa da múmkindik beredi», - dedi mınıstr.
Biryńǵaı tólemdi engizý úshin mınıstrlik arnaıy zań jobasyn ázirledi. Májilis depýtattary qujatty birinshi oqylymda maquldady.