Shara áskerı bólim komandırleriniń kásibı deńgeıin jetildirýge baǵyttalǵan.
Elordanyń desanttyq-shabýyldaý brıgadasynda jalpyáskerı jáne artılerıalyq brıgadalardyń, Qazaqstan Qarýly kúshteri Qurlyq áskerleriniń áskerı bólimderi men quramalary barlaý (taýly-egerlik) polkiniń komandırlerimen jıyn ótýde, dep habarlaıdy Almaty-akshamy.kz.
«Jıyn barysynda qazirgi kezdegi syn-tegeýrinder men qaýip-qaterlerdi eskere otyryp, Qurlyq áskerleriniń jaýyngerlik daıarlyq baǵdarlamalaryn jetildirý, barlaý bólimshelerin qaıta jaraqtandyrýdyń negizgi baǵyttary, túrli urysta kúshter men quraldardy qoldaný tártibi boıynsha nusqaýlyq-ádistemelik jáne praktıkalyq sabaqtar ótkiziledi»,- delingen Qorǵanys mınıstrliginiń baspasóz qyzmetiniń habarlamasynda.
Qorǵanys mınıstri, general-leıtenant Rýslan Jaqsylyqov bólim komandırlerimen kezdesti. Qorǵanys vedomstvosynyń basshysy senip tapsyrylǵan áskerı bólimderdegi isterdiń jaı-kúıine qatysty baıandamalardy tyńdady jáne Prezıdent Qasym-Jomart Toqaevtyń eldiń qorǵanys qabiletin odan ári nyǵaıtý jónindegi tapsyrmalary aıasynda birqatar mindetterdi belgiledi. Qarýly Kúshterdiń jaýyngerlik daıarlyǵyn qoldaýǵa nazar aýdaryldy.
Birqatar sabaqtar áskerı obektilerdiń dıversıaǵa qarsy qorǵalýyn qamtamasyz etý, arnaıy áskerı is-qımyldardy daıyndaý jáne júrgizý, áskerı qyzmettiń qaýipsizdigi jáne áskerlerdiń kúndelikti qyzmetin basqarý máselelerine arnaldy.
Brıgadalar men polk komandırleriniń qatysýymen ótken jıyn sheńberinde zańnama normalaryn, taktıkalyq normatıvterdi, jalpy áskerı shtabtardyń qyzmeti jónindegi nusqaýlyqtyń erejelerin bilýge test júrgiziledi.
Jıyn qazirgi zamanǵy áskerı qaqtyǵystarda quramalar men bólimderdiń qoldanylý erekshelikterin túsindirý maqsatynda uıymdastyrylyp, áskerı bólim komandırleriniń kásibı deńgeıin jetildirýge baǵyttalǵan.
