Un shyǵarý kvotasy engizilgen
Aýyl sharýashylyǵy mınıstri Erbol Qarashókeev astyq pen un eksportyna engizilgen shekteýlerdi alyp tastaýdy usyndy, dep habarlaıdy Almaty-akshamy.kz.
«Qyrkúıekte qazaqstandyq astyq pen unǵa sheteldik naryqtar qaıtadan ashylýy múmkin. Olaı deıtinim, qazir Aýyl sharýashylyǵy mınıstrligi syrtqy saýda saıasaty máseleleri jónindegi vedomstvoaralyq komısıaǵa bıdaı men undy shyǵarýǵa engizilgen shekteý sharalaryn alyp tastaý múmkindigin qarastyrýdy usynyp otyr. Bizdiń bul bastamamyz kelesi aptanyń basynda komısıa otyrysynda talqylanady», - dep jazdy mınıstr Facebook paraqshasynda.
Erbol Qarashókeev mınıstrliktiń bul sheshimi nemen baılanysty ekenin túsindirip ótti.
Onyń aıtýynsha, Qazaqstanda 30 qyrkúıekke deıin 550 myń tonna astyq jáne 370 myń tonnadan aspaıtyn un shyǵarý kvotasy engizilgen.
«Bul shekteýler engizilgen kezde biz, eń aldymen, kúrdeli halyqaralyq jaǵdaıdy eskere otyryp, ishki naryqta azyq-túlik daǵdarysyn boldyrmaı, saqtaýǵa tyrystyq. Onyń ústine, sol kezde Qazaqstanda ónimniń qandaı bolatynyn boljap bilý múmkin bolmady. Qazir jaǵdaı ózgerdi. Búgingi bıdaıdyń jalpy túsiminiń optımısik boljamy shamamen 13 mln tonna kóleminde bolady dep otyr. Bul - ótken jyldyń kórsetkishinen edáýir kóp. Sondyqtan biz aýyl sharýashylyǵy taýaryn óndirýshilerge astyq pen undy shetelge shyǵarýǵa ruqsat berýdi oryndy dep sanaımyz. Sebebi byltyrǵy qaldyqtardy qosa eseptegende, bıylǵy ónim qazaqstandyq jáne eksporttyq naryqqa da jetedi. Sondyqtan, aldaǵy ótetin jıynda bizdiń bul usynysymyz qoldaý taýyp, qyrkúıek aıynda barlyq eksporttyq shekteýler alynady dep úmittenemiz», - dep túıindedi sózin mınıstr.