Biz úshin bizdiń sportshylardyń barlyǵy da naǵyz Chempıondar!
Qazaqstannyń aqparat jáne damý mınıstri Aıda Balaeva Olımpıadaǵa qatysyp jatqan otandyq sportshylardy qoldaýǵa shaqyrdy, dep habarlaıdy Almaty-akshamy.kz.
«Ókinishke oraı, búginde Tokıo Olımpıadasyndaǵy keıbir sportshylarymyzdyń sátsizdigine kópshilik jaǵymsyz pikirler men tym ádiletsiz syn aıtyp jatyr. Onyń ishinde buǵan deıingi jarystarda elimizdiń atyn tórtkúl dúnıege tanytyp júrgen tanymal atletterimizdiń de attary atalýda. Mysaly, 2016 jyly Rıo Olımpıadasynda Vasılıı Levıttiń rıngtegi ónerine búkil elimiz tamsandy, oǵan kórsetilgen ádiletsizdikke birge jandary aýyrdy. Osy joly Vasılıı jeńildi, biraq onyń osy bes jyl ishinde elimiz úshin daıyndalyp, kezekti olımpıadalyq sıklden ótip, rıngke qaıta shyǵýynyń ózi qurmetteýge turarlyq sheshim dep sanaımyn»,– delingen mınıstrdiń áleýmettik jelidegi jazbasynda.
Sonymen qatar Aıda Balaeva Olga Rypakovanyń da eńbegin atap ótken.
«Olga Rypakovanyń da sátsizdigi men onyń kásibı karerasyn aıaqtaldy degen aqparat kóńilge tipti qaıaý túsiredi. Olga - búkil sanaly ǵumyryn otandyq sport jolyna arnap, elimizdiń atyn talaı márte dúbirli dodalarda asqaqtatqan birden bir jeńil atlet. Ol 36 jasynda óziniń tórtinshi Olımpıadasyna qatysyp, elimizdiń namysyn kezekti ret qorǵaýǵa sheshim qabyldady. Olar úlken sporttaǵy karerasyn aıaqtaǵanymen, aldaǵy ýaqytta ózderiniń izin basar shákirt tárbıeleýde úlken eńbek etedi dep senemin», – dep jazdy mınıstr.
Aıda Balaeva qandaı jaǵdaıda da uly sportshylarymyzdyń jetistikteri men jeńisterin biz eshqashan umytpaýymyz kerek dep sanaıdy.
«Qıyn sátterde qoldaý kórsetý arqyly ǵana biz olarǵa senim uıalatyp, keler kúnderdiń jeńisterinen úmit ete alamyz. Biz úshin bizdiń sportshylardyń barlyǵy da naǵyz Chempıondar!»,– dep jazdy Aıda Balaeva.
Japonıa astanasy Tokıoda ótip jatqan Olımpıadalyq oıyndarda Qazaqstan sportshylary 7 qola medal ıelendi. Qazirgi kezde Qazaqstan jalpykomandalyq esepte 76-orynda tur.
Eske sala ketsek, otandyq sportshylardyń kórsetken nátıjelerina kóńili tolmaǵan qazaqstandyqtar áleýmettik jelilerde «qola dáýiri bastaldy» degen taqyryppen sýretter sala bastaǵan bolatyn.