Bul sharýalar josparǵa sáıkes atqarylýda.
Bıyl Almatyda uzyndyǵy 9 shaqyrym bolatyn jylý qubyrlary jańartylyp jatyr. Mamandar qyrkúıek aıynda paıdalanýǵa beriledi dep otyr, dep habarlaıdy Almaty-akshamy.kz Almaty.tv saıtyna silteme jasap.
Bıyl jylý jelilerin aýystyrý barysynda Bostandyq, Medeý, Áýezov pen Almaly aýdandaryna basymdyq berildi. Qala boıynsha qazir 11 kóshede jumys qyzý júrip jatyr. Ol jumystardy kúzge deıin aıaqtaýdy 8 merdiger kompanıa mindetine alǵan.
«Jóndeý jumystary kezinde turǵyndar ystyq sýsyz qalmas úshin merdiger kompanıalardyń kúshimen turǵyndarǵa, aýrýhanalar bar, mektepter bar, eger joldyń boıynda ornalassa, olardyń bárine ýaqytsha ystyq sý qosylyp berilip otyrdy», – dedi kúrdeli qurylys jáne jóndeý basqarmasynyń bastyǵy Saıat Djıngılbaev.
Búginde qaladaǵy 1 mln. 260 myń úı ortalyqtandyrylǵan jylý júıesine qosylǵan. 634 myńǵa jýyǵy jeke qazandyqtyń kómegimen úılerin jylytady. Al, 1900 otbasy áli pesh paıdalanady.
«Ótken jyly 16,1 shaqyrym jylýmen qamtý júıeleri jańartyldy. Bul jumys nátıjesinde jylý qubyrlary 1,2 paıyzǵa tómendedi. Qazirgi tańda bul baǵytta 2023 jylǵa deıin atqarylýy tıis jumystardyń jospary jasalǵan. Osy ýaqytqa deıin 14,6 shaqyrym bolatyn qubyrlardy jańartýdy kózdep otyrmyz», – dedi Almaty qalasynyń ákimi Baqytjan Saǵyntaev.
Aldaǵy jyly qazandyq qondyrǵylaryn iske qosý mindettelip otyr. Qazir qalada 4 birdeı alyp qazandyqqa kúrdeli jóndeý jumystary júrgizilip jatyr. Máselen, "Almagúl" yqshamaýdanyndaǵy ońtústik qazandyq bıyl jyl sońyna deıin aıaqtalmaq. Paıdalanýǵa berilse, 55 Gkal/saǵ úzdiksiz jylýmen qamtıtyn biregeı qondyrǵy bolmaq.