Májilistiń jalpy otyrysynda depýtattar «Salyq kodeksine» ózgertýler engizý týraly zań jobasyn birinshi oqylymda maquldady.
Qazir eńbekaqy qorynynan birneshe tólemder júrgiziledi. Endi olar bir tólemge biriktirilýi múmkin, dep habarlaıdy Almaty-akshamy.kz.
Al áleýmettik aýdarymdardy jeke tabys salyǵy esebinen tómendetý kózdelip otyr. Qujatta jeke tulǵalardyń bankrottyǵy kezinde salyq salý máselesin retteý de qarastyrylǵan.
Eske salaıyq, byltyr Memleket basshysy Joldaýynda jıyntyq júktemeni azaıtyp, mıkro jáne shaǵyn bıznes úshin eńbekaqy tóleý qorynan alynatyn biryńǵaı tólemdi engizýdi tapsyrǵan.
«Qosymsha qun salyǵyn, áleýmettik salyqty bólek-bólek tóleıtin bolsa, sonyń barlyǵy biriktirilip, jáne tómendetiledi. Salyqtyń barlyq jıyntyqtaryn qossaq, shaǵyn jáne mıkro kásiporyndar 37 paıyzǵa deıin tóleıdi. Jańa barlyǵyn biriktirip kelgende 21,5 paıyzǵa deıin tómendetiledi», - deıdi QR Parlamenti Májilisiniń depýtaty Málik Qulshar.
Balyq óńdeýshige qosylǵan qun salyǵyn 70 paıyzǵa azaıtý týraly norma usynylyp otyr. Qazir mundaı jeńildikti balyq ósirýshi qojalyqtar qoldanady. Sonymen qatar qant óndirisin yntalandyrý úshin qant quraǵy ımportyn qosylǵan qun salyǵynan bosatý da qarastyrylady. Olar úshin bul salyq boıynsha jeńildikti uzartý da usynyldy. Depýtattar qujatty birinshi oqylymda maquldady. Ekinshi oqylym eki apta ishinde bolady. Jalpy, mundaı jeńildikterdi keler jyldan bastap engizý josparlanyp otyr.