Oıyl ózeniniń arnasynan asqan tasqyn sý Atyraý oblysyndaǵy Mıaly aýylynyń irgesine tirelip tur. Sońǵy aqparat boıynsha sýdyń deńgeıi – 1 metr 20 sm.
Mıaly – Atyraý qalasynan shalǵaıda ornalasqan Qyzylqoǵa aýdanynyń ortalyǵy. Qazir bul aýylda 7650 adam turady, dep habarlaıdy almaty-akshamy.kz
Aýdan ákimdiginiń málimetine súıensek, bıyl Mıaly aýylyn tasqyn sýdan qorǵaý úshin 2,7 shaqyrymdyq bóget bıiktetilgen. Qazir bógettiń bıiktigi – 2 metr.
«Bóget aýyldy tasqyn sýdan qorǵaıdy. Qazir evakýasıa ýaqytty tıimdi paıdalaný úshin jarıalanyp otyr. Dúrbeleńge salynyp, úreıge berilmeý qajet», - dep habarlady aýdandyq ákimdikten.
Keshe túsqaıta aýdandyq ákimdik tótenshe jaǵdaı jarıalady. Soǵan sáıkes, Mıalydaǵy turǵyndardy qaýipsiz jerge kóshirýge sheshim qabyldandy.
«Turǵyndardy qabyldaý úshin Y.Shórekov atyndaǵy mektep-gımnazıa, H.Dosmuhamedov atyndaǵy orta mektep pen «Nur-SHýaq» balabaqshasy daıyndaldy. Birinshi kezekte áıelder, balalar, naýqas adamdar, múgedekter kóshiriledi», -dep málim etken edi ákimdikten.