Osydan on eki jyl buryn, ıaǵnı 2011 jyly 1 jeltoqsanda Almaty metropolıteni iske qosylǵan bolatyn. Osy aıtýly dataǵa oraı Almaty mýzeıi óz shańyraǵynda «Almaty metrosy – el maqtanyshy» atty kórme ashty. Iá, metropolıtenimiz osylaı áspetteýge ábden turarlyq.
Megapolıstegi metropolıten júıesi – Qazaqstandaǵy alǵashqy, Orta Azıadaǵy ekinshi (Tashkentten keıingi) ashylǵan alyp qurylys. Elimiz úshin strategıalyq mańyzdy nysan. Onyń ashylýyn qala turǵyndarynyń óte uzaq kútkeni ras. Qurylysy 1988 jyly bastalǵan bolatyn. Sóıtip, jankeshti eńbek aqtalyp, zamanaýı jerasty kóligine qol jetkizdik.
Bastapqy metrojelisi jeti stansıadan turdy: «Raıymbek batyr», «Jibek joly», «Almaly», «Abaı», «Baıqońyr», «Muhtar Áýezov teatry» jáne «Alataý». Jalpy uzyndyǵy 8,5 km bolǵan. 2015 jyly «Saıran», «Máskeý» stansıalary ashylǵannan keıin metropolıten taǵy 2,74 shaqyrymǵa uzardy. Búginde Almaty metropolıteni qoǵamdyq kólikterdiń eń zamanaýı túrine aınaldy. Basqa kólikterge qaraǵanda jyldam júredi, dittegen jerińizge tez jetesiz, ıaǵnı altyn ýaqytyńyzdy únemdeısiz.
Metro beketteriniń erekshe sáýlet ónerimen kómkerilgen platformalary da almatylyqtardy jáne Almaty meımandaryn eriksiz baýrap alary sózsiz. Dálirek sýretter bolsaq, platformalardyń qabyrǵalary men edeni ejelgi tańbaly jazýlarda, qoldanbaly ónerde jáne sáýlet eskertkishterinde, qazaq halqynyń qazirgi zamanǵy ónerinde kezdesetin oıý-órnektermen, basqa da ulttyq reńktegi elementtermen aıshyqtalǵan. Metrostansıalar keń de jaryq, muntazdaı taza. Jolaýshylardyń qaýipsizdigine de barlyq jaǵdaı jasalǵan.
Keshegi ashylǵan kórmege Almaty mýzeıi qoryndaǵy metro tarıhyna qatysty qujattar, fotosýretter, kitaptar, marapattar jáne Almaty metropolıteniniń aıǵaqty zattaı materıaldary, metro syzbalary, sqemalary qoıylǵan.
Kórmeniń ashylýyna metro ardageri O.Smaǵulov, metrony elektrmen qamtamasyz etý qyzmetiniń aǵa energodıspecheri Ǵ.Baıqulov, joldar jáne tonneldik ǵımarattar qyzmetiniń bas ınjeneri E.Mamyrbekov qatysyp, metro tarıhyna qyzyǵýshylyq bildirgen qala turǵyndary men qonaqtaryna qyzyqty estelikter aıtyp berdi.