Fransıanyń «Parı Sen-Jermen» klýbynyń bas bapkeri Krıstof Galte komandanyń 3 maýsymdaǵy «Klermonǵa» qarsy kezdesýi belgili fýtbolshy Lıonel Messıdiń sońǵy oıyny bolatynyn rastady, dep habarlaıdy QazAqparat tilshisi Euronews-ke silteme jasap.
Argentınalyq shabýylshy Lıonel Messı fransıalyq «Parı Sen-Jermen» fýtbol klýbynan bıylǵy maýsym aıaqtalǵannan keıin ketedi.
«Men úshin fýtbol tarıhyndaǵy álemniń úzdik oıynshysyna bapkerlik jasaý - úlken mártebe», - dedi parıjdik klýbtyń bas bapkeri baspasóz máslıhatynda.
«Ol árqashan komanda úshin jumys istedi. Árdaıym oıynda boldy. Áriptesine pas berdi nemese gol soqty. Qaıtalap aıta keteıin, bul men úshin tek bapkerlik jasaý ǵana emes maýsymnyń barlyq kezeńinde qasynda júrgenimdi úlken mártebe dep baǵalaımyn», - dedi Galte.
«Parı Sen-Jermen» 3 maýsymda Parıjde Fransıa chempıonatynyń qorytyndy týrynda «Klermonǵa» qarsy oınaıdy. Parıjdik klýb aldyn ala el chempıony atanyp úlgerdi.
Messı komanda sapyna 2021 jyly erkin agent quqyǵy boıynsha qosylǵan edi. «Klermonǵa» qarsy oıyn ol úshin PSJ sapyndaǵy sońǵy kezdesý bolady.