Argentına úshinshi ret álem chempıony atandy
Qatarda fýtboldan álem chempıonatynyń fınalynda Argentına men Fransıa quramalary altyn júldeni sarapqa saldy, dep habarlaıdy Almaty-akshamy.kz QazAqparatqa silteme jasap.
Buǵan deıin Argentına men Fransıa eki retten álem birinshiliginde úzdik shyqqan edi.
Dúnıejúzilik dodada qos qurama úsh márte kezdesip, ekeýinde Argentına (1930 jyly – 1:0, 1978 jyly – 2:1) jeńiske jetti. 1978 jylǵy óz elinde ótken chempıonatta Maradona bastaǵan argentınalyqtar jeńimpaz atanǵan edi.
Tórt jyl buryn Reseıdegi jarysta 1/8 fınalda Fransıa Argentınadan 4:3 esebimen basym túsip, sonda Kılıan Mbappe qos goldyń avtory atanyp, Lıonel Messı kózge túse almaǵan bolatyn.
Bıylǵy chempıonatta bes goldan soǵyp, mergender kóshin bastap kele jatqan Messı men Mbappe fınaldyq machta úzdik ataný úshin baryn salatyny anyq-ty. Ásirese, bul Messıdiń sońǵy álem chempıonaty-tuǵyn.
Bul joly 21-mınýtta sol qanattan aıyp alańyna ekpindeı kirgen Anhel Dı Marıany Ýsman Dembele shalyp qulatty. 23-mınýtta Lıonel Messı 11 metrlik penaltıdi múltiksiz oryndap, Argentınany alǵa shyǵardy – 1:0.
Sodan keıin 36-mınýtta Messı asyrǵan dopty Makallıster Dı Marıaǵa dál berdi. Dı Marıa qatelesken joq – 2:0.
Ekinshi kezeńde 79-mınýtta argentınalyq Nıkolas Otamendı Rendal Kolo Mýanıge qarsy oıyn tártibin buzdy. Kılıan Mbappe 80-mınýtta penaltıdi qur jibergen joq. İle-shala Kolo Mýanıden pas alǵan Mbappe tarazy basyn teńestirip úlgerdi – 2:2. 90+7-mınýtta Ýgo Lorıs Messıdiń qaýipti soqqysyn qaıtardy.
Qosymsha eki ekstrataımda 109-mınýtta Ý.Lorısten keri serpilgen dopty Messı qaqpaǵa kirgizdi – 3:2. Áıtse de 118-mınýtta K.Mbappe penaltıden dopty taǵy da torda týlatty – 3:3. Bul fınalda het-trık jasaǵan Kılıannyń osy chempıonattaǵy 8-inshi goly edi. Ol, sóıtip, birinshiliktiń surmergeni atandy.
Penaltı serıasynda Fransıany 4:2 esebimen jeńgen Argentına óz tarıhynda úshinshi ret álem chempıony atandy.
Eske sala keteıik, budan buryn Horvatıa quramasy qaqpashysynyń soqqyny qaıtarý jóninen úzdik atanǵanyn jazǵan bolatynbyz.
Sondaı-aq Messı álem chempıonattarynyń rekordyn ornatty.
Messı álem chempıonatynda gol salý jóninen Peleni qýyp jetti.