Jańa qonystanýshylarǵa páter kiltteri Qazaqstan polısıasy kúninde saltanatty túrde tabys etildi.
Almaty oblysynda 60 polısıa qyzmetkeriniń otbasy baspanaly boldy, – dep habarlaıdy Almaty-akshamy.kz Polisia.kz-ke silteme jasap.
Jańa qonystanýshylarǵa páter kiltteri Qazaqstan polısıasy kúninde saltanatty túrde tabys etildi. Rásimge Almaty oblysy ákiminiń orynbasary Lázzat Turlashev, Almaty oblysy polısıa departamentiniń bastyǵy Serik Kúdebaev , «Otbasy Bank» AQ oblystyq fılıalynyń basshysy Ǵalymjan Shalǵymbaev qatysty.
«Búgin biz departament úshin mańyzdy oqıǵanyń kýási bolyp otyrmyz – 60 qyzmetkerimizdiń otbasy óz baspanalaryna ıe boldy. Qazaqstan Respýblıkasynyń Prezıdenti Qasym-Jomart Toqaev óz Joldaýynda azamattardyń áleýmettik ál-aýqaty basty basymdyq bolyp tabylatynyn atap ótti. Osyǵan baılanysty, sondaı-aq «İshki ister organdaryn jańǵyrtý jónindegi Jol kartasyn» iske asyrý sheńberinde QR İshki ister mınıstri áskerı qyzmetshilerge uqsas turǵyn úıdi satyp alý úshin ony jalǵa alǵany úshin ótemaqy tóleýdi polısıa qyzmetkerlerine paıdalaný múmkindigi týraly máseleni bastamashylyq etip, odan ári Úkimet qoldaǵan. Almaty oblysynyń ákimi Amandyq Batalovqa, onyń orynbasarlaryna, sondaı-aq Taldyqorǵan qalasynyń ákimine alǵys aıtqym keledi. Olardyń kómeginiń arqasynda bizdiń qyzmetkerler jańa úıden páter kiltterin aldy», – dep atap ótti óz sózinde Almaty oblysy polısıa departamentiniń bastyǵy Serik Kúdebaev.
Sonymen qatar spıker polısıa qyzmetkerleri úshin turǵyn úı satyp alýda «Otbasy Bank» mańyzdy ról atqarǵanyn atap ótti. Bul bank tez arada jaýap qaıtaryp, polısıa qyzmetkerlerine qaryz berýdi sheshti. Bankke tórt júzge jýyq qyzmetkerdiń turǵyn úı satyp alýǵa qujattary joldandy. Birinshi kezeńde tekserip, zerdelegennen keıin olardyń 60-y maquldanǵan.
«Qazirgi kezeńde polısıanyń negizgi mindetteriniń biri «qadamdyq qoljetimdilik» bolyp tabylady. Kórip otyrǵanymyzdaı, memleket ony tıimdi sheshý úshin barlyq qajetti jaǵdaılardy jasaýda. Biz otandastarymyzdyń qaýipsizdigine degen senimdilikti, olardyń konstıtýsıalyq quqyqtary men bostandyqtaryn qorǵaýdy qamtamasyz etý, sondaı-aq oǵan muqtaj adamdarǵa kómek kórsetý úshin barlyq sharalardy qabyldaıtyn bolamyz. Búgingi is-shara – bul alǵashqy tájirıbe. Budan ári qolda bar tájirıbeni eskere otyryp, ońtústik óńirdiń aýdandyq bólimsheleri – Qarasaı, Talǵar, İle aýdandarynyń qyzmetkerleri úshin úıler salýdy josparlap otyrmyz», – dep túıindedi Serik Kúdebaev.