Almatyda Memlekettik qýyrshaq teatrynda Berdibek Soqpaqbaevtyń «Meniń atym Qoja» povesi sahnalanady
Almatyda Memlekettik qýyrshaq teatrynda 10 jylda alǵash ret jańartý jáne jóndeý jumystary júrgizildi, dep habarlaıdy almaty-akshamy.kz
Almatyda Memlekettik qýyrshaq teatryn jańǵyrtý jáne jóndeý jumystary aıaqtaldy. Atap aıtqanda, kórermender jaıǵasatyn zaldaǵy oryndar qalpyna keltirilip, sahna keńistigi, daıyndyq zaldary, kıim aýystyratyn bólmeler, ǵımarattyń foıeleri, kıim-keshek bólmeleri, sanıtarlyq-gıgıenalyq jáne basqa da úı-jaılar jóndeldi. Sonymen qosa, sapaly daýys pen jaryqty qamtamasyz etetin sońǵy úlgidegi zamanaýı sahna jabdyqtary jańartyldy. Qazir jóndeý jumystarynan keıin mekemeni tazartyp, foıe dızaınyn jaqsartý úshin jumys istep jatyr.
Aıta keteıik, Almaty qalasynyń ákimi Erbolat Dosaev 2022 jyldyń shilde aıynda megapolıstiń keıbir mádenı nysandaryn aralaý barysynda Memlekettik qýyrshaq teatryn jańartý men jóndeýdi, sonymen qatar, teatr aýmaǵyn abattandyrýdy tapsyrǵan bolatyn.
«Kelesi jyly teatrdyń qurylǵanyna 90 jyl tolady. Jyl saıyn shamamen 80 myńnan astam kórermendi qabyldaıtyn óner ordasy búldirshinderdiń de, eresek azamattardyń da súıispenshiligine bólenip keledi. Árıne, bul bizdi qýantady. Ǵımaratty qalpyna keltirý 10 jyl buryn júrgizilgen. Alaıda qýyrshaq teatrynyń jabdyqtary eskirgen, al ıntereri jańartýdy qajet etti. Sondyqtan qala ákimi ǵımaratty jóndeýge, jabdyqty jańartýǵa jáne qýyrshaq teatrynyń qyzmetkerlerine qolaıly jaǵdaı jasaýǵa sheshim qabyldady. Jaqynda kórermender ózderiniń súıikti qoıylymyna qatysyp, spektáklderdi jaıly jaǵdaıda tamashalaı alady», - dedi Almaty qalasy Mádenıet basqarmasynyń basshysy Ǵanı Maılybaev.
Al teatrdyń shyǵarmashylyq ujymy kórermenderge birneshe premera daıyndap jatyr. Olardyń arasynda Sharl Perro ertegisi negizinde «Etik kıgen mysyq», Gogoldyń «Shınel» jáne Berdibek Soqpaqbaevtyń «Meniń atym Qoja» povesi jáne basqa da spektáklder bar.
Kúrdeli jóndeýden keıin teatr óziniń alǵashqy qoıylymyn 2024 jyldyń aqpan aıynyń sońyna taman kórermen nazaryna usynady. Qoıylymdar kestesi jaqynda teatrdyń Instagram-daǵy resmı paraqshasynda @kuyrshak_teatry jáne puppet.kz saıtynda jarıalanady. Esterińizge sala keteıik, teatr Pýshkın kóshesi, 63 mekenjaıynda ornalasqan.
