Logıstıka jáne kólik akademıasynda oqý-ádistemelik birlestiktiń keńeıtilgen Respýblıkalyq oqý-ádistemelik keńes otyrysy ótti.
Máselelerdi talqylaý jáne jastar arasynda kólik kásipteriniń tartymdylyǵyn arttyrý tetigin ázirleý úshin Logıstıka jáne kólik akademıasy alańynda 2023 jyly 1 jáne 2 jeltoqsan kúnderi «Injenerıa jáne ınjenerlik is», «Kólik qyzmetteri» mamandaryn daıarlaý baǵyttary boıynsha QR ǴjJBM Respýblıkalyq oqý-ádistemelik keńesiniń oqý-ádistemelik birlestiginiń (QR ǴjJBM ROÁK OÁB) keńeıtilgen otyrysy ótti, dep habarlaıdy Almaty-akshamy.kz QR Ǵylym jáne joǵary bilim mınıstriligine silteme jasap.
Atalǵan is-shara aıasynda «QTJ» UK AQ qoldaýymen QR Ǵylym jáne joǵary bilim mınıstrligi, QR Ulttyq ǵylym akademıasy, QR Kólik mınıstrligi, salalyq qaýymdastyqtary men odaqtary «Samuryq-Qazyna» UÁQ» AQ, «QazAvtoJol» UK» AQ, «Atameken» QR UKP jáne kóliktik-logıstıkalyq baǵyt boıynsha bilim berý baǵdarlamalaryn iske asyratyn joǵary oqý oryndarynyń ókilderiniń qatysýymen «Senimdi túlek» dóńgelek ústeli uıymdastyryldy.
Birinshi kúni plenarlyq jáne seksıalyq otyrystarda temirjol kóligi men logıstıka úshin kadrlar daıarlaýǵa erekshe nazar aýdaryldy. Sondaı-aq, kún tártibinde ózekti bilimi men daǵdylary bar, tez ózgeretin jaǵdaıda jedel sheshim qabyldaýǵa qabiletti jańa býyn mamandaryn daıarlaý úshin kólik joǵary oqý oryndarynyń jumys berýshilermen jáne kólik-logıstıka salasynyń salalyq qaýymdastyqtarynyń ókilderimen yntymaqtastyǵy men ózara is-qımylyn damytýǵa baǵyttalǵan mańyzdy jáne strategıalyq máseleler qarastyryldy.
Dóńgelek ústeldiń ekinshi kúni Avtomobıl kóligi men avtomobıl joldaryna basymdyq berildi. Kólik ǵylymyn damytý jáne bilim berý júıesi úshin qazirgi zamanǵy syn-qaterler týraly máseleler qozǵalǵan jerde kólik salasyndaǵy bilikti kadrlarmen qamtamasyz etý jáne halyqaralyq kólik qyzmetteri salasyndaǵy bilikti kadrlardyń tapshylyǵy máseleleri boıynsha belsendi pikirtalastar boldy.
45-ten astam JOO belsendi qatysqan ROÁK OÁB keńeıtilgen otyrysynyń qorytyndysy boıynsha , memlekettiń kólik salasy úshin kadrlar daıarlaý jónindegi jol kartasy ázirlenýde. Sondaı-aq, Logıstıka jáne kólik akademıasy men «QTJ» UK» AQ eki kúndik otyrysy aıasynda ALT, MTMÝ, QazUTZÝ stýdentteri úshin motıvasıalyq sesıalar jáne bilim alýshylar men OÁB músheleri úshin trenıńter ótkizildi.