«QazIndustry» Qazaqstandyq ındýstrıa jáne eksport ortalyǵy otandyq ónerkásiptik kásiporyndarǵa eńbek ónimdiligin arttyrý jáne ónimdi ishki naryqqa ilgeriletý baǵyttary boıynsha shyǵyndarynyń bir bóligin óteý sharalaryn jalǵastyrýda, dep habarlaıdy aqshamnews.kz.
QR Ónerkásip jáne qurylys mınıstrliginiń málimetinshe, Aǵymdaǵy jyldyń segiz aıynyń (qańtar-tamyz) qorytyndysy boıynsha otandyq kásiporyndarǵa 792,7 mln teńgege shyǵyndary ótelgen. Bul týraly bıznesti yntalandyrý dıreksıasy habarlady.
Ótinimderdi qaraýdyń nátıjesinde birinshi baǵyt - eńbek ónimdiligin arttyrýǵa baǵyttalǵan memlekettik yntalandyrý sharalary boıynsha ótelgen qarajattyń jalpy somasy 772,6 mln teńgeni qurady. Bul baǵyt boıynsha ótinimderdiń basym bóligi Almaty q.(74), Almaty oblysynan (71), Shymkent (67) jáne Astana (55) qalalarynan kelip tústi.
Ekinshi baǵyt - otandyq óńdelgen taýarlardy, jumystar men kórsetiletin qyzmetterdi ishki naryqqa ilgeriletýge baǵyttalǵan memlekettik yntalandyrý sharalary boıynsha ótelgen soma 20,1 mln teńgeni qurady. Ótinim berý boıynsha kóshbasshy óńirler Batys Qazaqstan, Pavlodar jáne Qostanaı oblystary men Almaty qalasy boldy.
Salalyq bóliniste ótinimderdi kóbinese mashına jasaý, tamaq jáne sýsyndar óndirisi, jeńil ónerkásip jáne metalýrgıa sektoryndaǵy kásiporyndar jibergen.
Sonymen qatar, QazIndustry mamandary turaqty túrde ónerkásip kásiporyndaryna shyǵyndardyń bir bóligin óteý sharttary men tetikterin túsindirý jumystaryn júrgizedi. QazIndustry ókilderi telefon arqyly konsýltasıalar berip, Ashyq esik kúnderin ótkizedi. Sondaı-aq, mamandar kásiporyndarǵa barý arqyly jáne túrli beıindi forýmdar men konferensıalarda óz qyzmetterin tanystyrady.