Úkimet otyrysynda otandyq óndirýshilerdi qoldaý sharalary talqylandy.
Atap aıtqanda, 2025 jyldyń 1 qańtarynan bastap kúshine engen Memlekettik satyp alý týraly zańnyń alǵashqy nátıjelerine erekshe nazar aýdaryldy, dep habarlaıdy aqshamnews.kz sala mınıstrligine silteme jasap.
Qarjy vıse-mınıstri Dáýren Keńbeıldiń aıtýynsha, bıylǵy 5 aıda memlekettik kelisimsharttardyń rekordtyq kólemi baıqaldy – jalpy somasy 5 trln teńgege 845 myń kelisimshart jasalǵan. Byltyrǵy kezeńde 2,4 trln teńgege 660 myń kelisimshart tirkelgen-di, ıaǵnı ósim aıtarlyqtaı túrde artqan.
«Memlekettik satyp alý týraly» Zańǵa sáıkes ulttyq rejimnen alyp qoıý tizbesi edáýir keńeıtilip, bul sheteldik óndirýshilerge memlekettik satypalymnyń belgili bir sanattaryna qatysýyn shektedi. Atalǵan tetikti qoldaný onyń tıimdiligin kórsetti. Nege deseńiz, bul amal otandyq taýarlardyń satypalym salasyndaǵy úlesin arttyrýǵa septigin tıgizip, jergilikti óndiristi damytýǵa jol ashady.
Zańda Qarjy mınıstrligi bekitken tizim men kólemge jáne qaǵıdalarǵa sáıkes shaǵyn jáne orta bıznes sýbektilerinen satyp alýdyń basymdyqqa ıe tártibi qarastyrylǵan. Bul sheshim SHOB sýbektileriniń memlekettik satypalymǵa qatysýyn kúsheıtýge, sondaı-aq otandyq shaǵyn jáne orta býyn kásiporyndaryn turaqty tapsyrys pen olardyń ornyqty ósimin qamtamasyz etýge baǵyttalǵan. Osy arqyly elimizde kásipkerlik pen jumyspen qamtý isin damytýǵa qosymsha jaǵdaılar jasalyp otyr.
Budan basqa ofteık-kelisimsharttardy bir kózden alý tásilimen jasasý praktıkasy josparly túrde engizilip jatyr. Osy tásil ásirese ónimdi satýdyń uzaqmerzimdi kepildikterin qajet etetin kásiporyndar úshin óte mańyzdy.
Qazir iske asyrylǵan jumyspen qatar otandyq taýar óndirýshilerdi qoldaý sharalary jalǵasyp keledi. Memlekettik satyp alý erejelerine birqatar jańa túzetý engizilmek. Olar kelisýdiń sońǵy satysynda tur jáne jaqyn arada qabyldanatyn bolady. Negizgi ózgeristerdiń qatarynda otandyq taýar óndirýshiler úshin avansty 30 paıyzdan 50 paıyzǵa deıin ulǵaıtý, jetkizý merzimin 15 kúnnen 60 kúntizbelik kúnge deıin arttyrý, sondaı-aq tólem merzimin 30 kúntizbelik kúnnen 10 jumys kúnine deıin azaıtý syndy jańashyldyqtar bar. Atalǵan reforma qyzmet kórsetýshilerdiń ótimdiligi men qarjylyq turaqtylyǵyn arttyrýǵa múmkindik beredi.
Qosymsha otandyq taýar óndirýshiler úshin 3 paıyz mólsherinde shartty jeńildikti engizý, sondaı-aq qazaqstandyq taýar óndirýshiler tizimine qosý prosesin avtomattandyrý qarastyrylyp otyr.
Osy sharalar ákimshilik júktemeni azaıtýǵa, rásimderdi jedeldetip, otandyq bıznes úshin satypalym júıesiniń qoljetimdiligin arttyrýǵa baǵyttalǵan.
«Sybaılas jemqorlyqtyń syn-qaterine jol bermeý úshin óndirýshilerdi otandyq taýar óndirýshiler tizimine engizýdiń tolyq avtomattandyrylǵan prosesi iske asyryldy. Tizimdi ónerkásip maqsatynda paıdalanýǵa engizý bıylǵy tórtinshi toqsanǵa josparlanǵan. Tutastaı alǵanda, memlekettik satypalym júıesinde otandyq óndirýshilerdi qoldaý ári taýar óndirýshiler tizimin avtomattandyrý boıynsha jumystar jalǵasatyn bolady», - dedi Dáýren Maratuly.
Jańa zań Qazaqstannyń óndirýshileri men kásipkerlerge satypalym prosesterine qatysý múmkindigin aıtarlyqtaı keńeıtip, qajetti rásimderdiń ashyqtyǵyn qamtamasyz etý men búdjet qarajatyn tıimdi jumsaýǵa oń áser etedi.
Sıfrlandyrý men yntalandyrý amaldaryn engizý arqyly memlekettik satypalym prosesi jergilikti bıznesti jolǵa qoıyp, jumyspen qamtý men respýblıkadaǵy ónerkásip áleýetin damytýdyń pármendi quralyna aınaldy.